Weşanxaneyê kurdan ê ke Fuarê Kitaban ê Stenbolî de cayê xo girewtî vatişê wendoxanê xo yê “Se beno wa bibo ma do fek ziwanê xo ra vera nêdê” ard vîrî û vat ke înan zî hemverê sansurî de xo resnayo wendoxanê xo.
Fuarê Kitaban ê Stenbolî ke reya 37. yeno viraştene emser bi temaya “Edebîyatî dir dorpêştişê cuye” Merkezê Fuar û Kongre yê TUYAPî de yeno viraştene. Emser mîyanê 800 weşanxane û sazîyanê sivîlan de weşanxaneyê sey Aram, Rûpel, Ava, Lîs, Avesta, Ar û Na yê ke hem kitabanê kurdkî hem zî yê tirkî çap kenê estê.
‘ZIWANÊ KURDKÎ WENDOXÊ XO ARDÎ RA’
Koordînatorê Weşananê J&J yî û nûştox Azad Zalî da zanayene ke înan xeylî kitabê kurdkî weşanayê. Zalî bale ante ke dimayê îlankerdişê OHALî ra sazî û weşanxaneyanê kurdan xeylî zirar dîyê û înan ra çend hebî zî ameyê girewtene. Zalî nê vatî: “Ez eşkena vajî ke nê des serranê peyênan de kurdkî xo rê rayîrêk xêz kerd û cayêk viraşt. Hendî wendoxê kurdkî ro kitabanê bikalîteyan gêrenê. No ramojneno ke nê ziwanî wendoxê xo ardê ra.”
Zalî wina dewam kerd: “Warê cigêrayîş û îlimî de xebatî hewna kemî yê. Ma warê psîkolojî de bi kurdkî 7 hûmarê kovare vetî. Wendoxî hendî nêvanê wa kurdkî bo senî beno wa bibo. Eke muhtewaya kitabî bihêz mebo wendoxî ê tercîh nêkenê.”
‘ELEQEDARÎYÊKA PÎLE ESTA’
Zalî wina vat: “Hemverê zextanê serê kurdkî de wendoxanê kurdkî fek wendişê kurdkî ra vera nêdayo. Fuarê Amedî de eleqedarîya tewr pîle seba kurdkî amî ramotene.”
Edîtorê Weşanxaneyê Lîsî Firat Fîdanî zî da zanayene ke kitabê ke hetê weşanxaneyê înan ra vejênê zafane berhemê edebîyatê dinya yê û wina vat: “Seke yeno zanayene rêzilka Cervantesî dinya de yena zanayene. Ma nê berhemî açarnayî kurdkî. Nika kitabo çarin de yo û roja ewilêne ra eleqedarîyêka pîle esta.”
Fîdanî vat kitabê ke derheqê tarîxê kurdan de yê zî mîyanê berhemanê ke hetê weşanxaneyê înan ra vejênê de yê.
‘RIXMÊ SANSURÎ DE MUCADELEYÎ RÊ DEWAM’
Edîtorê Weşanxaneyê Aramî Ulaş Guldîkenî zî vat: “Ma bi perspektîfê wendox kamca bo ma zî ûca yê têgêrenê. Fuarî seba ma firsendêk ê ke ma bi înan resenê wendoxan. 2 serranê peyênan de nizdê se kitabê ma ameyî qedexekerdene. Rixmê heme zextan de zî ma xo resnenê wendoxanê xo.”
Guldîkenî nê vatî: “Wendoxê kurdan raşte raşt nêwanenê. Ewnênê kalîte û xusûsîyetê weşanî ra. Na yewe ra weşanxaneyî zî mecbûr manenê ke kalîteya xo bikerê zêde”
