Qezaya Cizîrî Şirnexî cinîya bi nameyê Wetha Kolanç (50) bi kilamanê şewata zerrîya xo ana ziwan. Wetha ke C domanîya xo de dîyaye zewijnayene û maya hîrê domanan a. Wetha dima ke zewijîyaye mêrdeyê aye hewî arda ser û aye zî mêrdeyê xo verdayo. Wetha 10 serrî yo ke bi hîrê domananê xo têkoşînê cuye dana. Wetha vera pêro zor û zehmetîyê cuye vinderta û domanê xo pîl kerdî.

Wetha ke dengbêjî kena dejê xo bi kilaman ana ziwan û hetêk ra zî kulturê dengbêjî pawena. Wetha ard ziwan ke aye domanîya xo de zî kilaman vatêne û sey “Eyşe Şan” şinasîyayêne. Watha vat: “Ez dadîya xo ra dengbêjîye musaya. Wexto ke dadî, babî kal û pîranê mi kilaman vatêne, mi ê goşdarî kerdêne. Ma reyan cinîyanê dengbêjan reyde yenê têhet. Wexto ke ma şîyêne veyve, çol û seyranan ma kilamî vatêne. La nika veyvan de her kes sazbendan ano û mîyanê cemaetî de  hînî dengbêjîye qîmet nêvînena. Kulturê ma yo verên dengbêjîye ho çin beno. Dengbêjî parçeyêkê adetê ma yo. Ganî her kes wayîrê ci vejîyo. Eke no kultur destê ma ra şoro şarê ma zî beno çin.” 

Wetha peynîya qiseykerdişê xo de wina vat: “Estanika her kilamêke raştîya cu ya. Wexto ke ma nê kilaman goşdarî kenê, hêsrî çimanê ma ra yenê warî. Kilamê ke ez vana; derheqê xoverdayîş, dej, weşî û şayî de yê. La ma hînî veyvan de kilaman nêvanê. Çunke  teknolojî û sazbendan ra dima dawetî vurîyayî. Ma nêwazenê ke kulturê destî ra şoro.''