Şaristanê Winterthurî yê Swîsre de warê Quartierverein Gutshickî de Festîvala Domanan ameye kerdene. Domanan qiseykerdişê akerdişî kerd. 

Festîvale de xeylêk aktîvîte û musabeqayî ameyî kerdene û tewr zaf zî standê boyaxkerdişî eleqe dî. Keyeyan seba kursanê ziwanê kurdkî domanê xo qeyd kerdî.  

Hemserekê Merkezê Komelê Kurdan ê Demokratîkî yê Swîsre Îsmaîl Kayayî festîvale de qisey kerd. Kayayî her kesî rê sipas kerd û vat: ''Ma serrgêra dardekerdişê Şêxs Seîd, şehadetê Zîlane û Qirkerdişê Sêwasî de yê. Ma pêro şehîdanê xo bi rêzî yad kenê.''

Hemserekê Enstîtuyê Kurdkî yê Swîsre Cemal ozçelîkî domanan rê sipas kerd û vat: ''Tîya de domanan kursanê ma rê qeydê xo viraşt. Ma do pêro kantonanê Swîsre de kursanê kurdkî akerê.''

Festîvale de musabeqayî ameyî kerdene û seba domananê ke beşdarê kursê kurdkî sertîfîkayî ameyî dayene. Dima domanan seba domananê kurdanê ke ameyê qirkerdene leyî nayî ro.

Festîvale de hunermendî Elenora Gelawêj, Turan Şengul û Serhado vejîyayî sehne ser. Doman û keyeyan pîya govende girewte û festîvale bi coşî qedîyaye.