Xelata Şîîre ya Metin Altiokî  dîyaye Şaîr Îlhan Samî Çomako ke 28 serrî yo bîlasebeb zîndan de yo. Heyetê Vîjnayîşî yê Xelata Şîîre ya Metin Altinokî sebebê dayîşê xelate pê nê vatişan ard ziwan:

''Wexto ke merdim tênatîya sey mergî, 'vînêkerdişêkê vîrî' de helisyeno; xoza bêheskerdişêkê sey rijnayîşî de gangêş de ya, dinya ke tede bê ters û şîdetî ameyoxê komelî çîn o, rixmo ke 28 serrî yo mîyanê na dinya de nêciwîyeno, bi şîîrêka îstîsnayîye, bi ziwanê xorî, kede, eşq, azadîye û heskerdişî, bi xeyalê haştîye dinya û merdimî newe ra nano ro, nê semedî ra ma Xelata Şîîre ya Metin Altinokî ya 15. dîyarîye kitabê “Hayattayız Nihayet” (Cuya ma peynî de) yê Îlhan Samî Çomakî kenê. ma Şaîrê xo pîroz kenê.''

Îlhan Samî Çomako ke 1973 de Kanîreşê Çewlîgî de ameyo dinya  1994 de gama ke Unîversîteya Îstanbulî de wendêne bi sûcdarîya bi nameyê PKKyî daristan vêşnayo tepişîya. Nezarat de û prosesê tepiştişî de raştê îşkenceyî ame. Mehkemeyanê Asayîşî yê Dewlete de ame muhakemekerdene. Dewaya ci 6 serrî kerde derg.  Sûcê vêşnayîşê daristina gina war la bi falîyetanê ke bi nameyê PKKyî kerdî ame sûcdarkerdene û cezaya îdamî dîyaye ci. Seba ke îdam ame wedaritene cezaya ci açarîyaye muebet.

Çomakî  2001î de muracatê Mehkemeya Heqanê Merdiman a Ewropa (MHME) ked û vat seba ke hetê dadgerê leşkerî ra ameyo muhakemekerdene qeraro edîl nêameyo dayene. MHME 2006 de qerar girewt ke muhakemekerdişo edîl nêameyo kerdene û waşt wa newe ra muhakemekerdiş bêro kerdene. No qerar 8 serrî cuwa pê ame caardene. Çomak 11ê adara 2014î de reyna vejîya mehkeme û reyna cezaya hepsê muebedî dîyaye ci. Rixmo ke qet kanitêk çîn o Meykemeya Berze rayna ceza tesdîq kerde.