Saîro çewlîgij Îlhan Samî Çomako ke 27 serrî yo tepişteyo endamîya anorkî ya Galler PENî dîyaye ci

Sereka Galler PENî Menna Elfyn Çomakî rê mektubêk şawit û vat: ''Ma pê zerweşîya pîle şima  Endamîya Anorkî ya Mîyanneteweyî ya Galler PENî rê dawet kenê ke xebatanê şima nas bikerê.''

8ê adare de Hetê PEN Norveç û PEN Gallerî ra bi aktîvîteyêka online rojbîyayîşê Çomakî û endamîya ci ya Galler PENî  do bêrê pîrozkerdene. Aktîvîte do bi saeta welatî 20:00 de bêro kerdene.

Îlhan Çomak serra 1973 de Kanîreşê Çewlîgî de ame dinya. 1994  de Çomak wexto ke 21 serre bi û Fakulteya Edabîyatî ya Unîversîteya Îstanbulî de Beşê Cografya wendêne ame destbendkerdene. Îlhan Çomak 16 rojî binê îşkenceyî de nezaret de mend û mehkeme de hetê dozgerê leşkerî ra bi îdîaya ''bi nameyê PKKyî daristanvêşnayîşî'' ame tepiştene.  Çomak serra 2000î de îdamî rê ame mehkumkerdene û semedê halê ci yê holî ya cezaya ci açaryaye muebetê giranî. Mehkemeya Heqanê Merdiman a Ewropa 2007 de qerar da ke Çomak edîl nêameyo muhakemekerdene û 2013 de dewaya ci newe ra ameye dîyene la netîceya ci nêbedilyaye.