Aktîvîteya Xelatê Edebîyatî yê Huseyîn Çelebîyî ke her serre bi hawayo sîstematîk yena viraştene, emser reya 26. bajarê Frankfurtî yê Almanya de ameye viraştene. Şîîre û hîkayeyê kilmî ke bi ziwananê kurdî (kirmanckî, kurmancî), tirkî, erebkî û almankî de ameyî nuştene, hetê jurîyî ra ameyî erjnayene û xelatî dîyayî eseran.

Aktîvîte sere de Umît Acaro ke 26ê êlule de seba protestokerdişê tecrîdî xo veşnabi û seba heme şehîdan bi deqayêk rêzgirewtişî dest pêkerd. Dima ra Koma Delal Amede vejîya sehne û deyîrî vatî.

Muzîkî ra dima ser nameyê YXK û JXKyî de qiseykerdişî ameyî kerdene. Qiseykerdişan de ame vatene ke ê bi na aktîvîteye hedef kenî ke wayîrê kulturê kurdan bivejyî. Reyna qiseykerdişo ke ser nameyê YXKyî ame kerdene de ame dîyar kerdene ke ê bi şîarê ‘Cinîya azade, komelo azad o’ xebatanê xo kenî.

Pîyê Huseyîn Çelebîyî Rifat Çelebî zî dawetê sehne ame kerdene. Çelebîyî va ‘ez veng dana heme kurdan ke wa wayîrê kulturê xo bivejyî û kurdî bimusî’ û wina domna: “Yê ke kurdî nêmusenî, destek danî polîtîkayanê asîmîlasyonî.”

Aktîvîte de sîyasetemedarê kurdan Faysal Sariyildizî zî qisey kerd. Sariyildizî wina va: “Yê ke ewro wendekar î, dayîke û pîyê zafê înan nêwendo. Rolê wendekaran mîyanê ciwananê kurdan de zaf o. Tevgerê Azadîye ewil hetê wendekaran ra amebî awan kerdene.”

Aktîvîte de hunermendê bi nameyê Rotînda, Denîz Demane û Les Etoîsle de Botan zî vejîyayî sehne.

Eserê ke aktîvîte de xelatî girewtî, nê yî:

Beşê şîîranê kurmancîyan de Habîb Aslan ‘Hestî’

Beşê hîkayeyê kilmî yê kurmancî de Dilzîz Mizgîne ‘Senfonya Azadiyê’

Beşê hîkayeyê kilmî yê kirmanckî de Mehmet Seyîtalîoglu ‘Dager’

Beşê şîîranê tirkîyan de Alî Koç ‘Çeyrek Asir’

Beşê hîkayeyê kilmî yê tirkî de Murat Kozat ‘Gar’

Beşê şîîranê erebkîyan de Newroz Musleme ‘Ez şima rê kurdan dana şinasnayene’.

Beşê şîîranê almankîyan de zî Dewran Dêrsimî ‘Kalte in der Wuste’.