Şertanê zehmetan de huner

Berîvan Hemûşe resamêka Efrînij a. Berîvane kena ke rixmê şertanê koçberî û mîyanê zehmetîyan de zî hunerê xo bica bîyaro û vana ke a bi hunerê xo cewab dana îşxalê dewleta Tirkî.

Berîvan Hemûşa ke dewa Zarko ya qezaya Raco ya Efrînî ra ya, mehlaya Şêxmeqsûdî ya Helebî de bîya pîle, Fakulteya Huneranê Rindekan ê Unîversîteya Helebî ra mezun bîya. Berîvane vero ke krîzê Sûrîye xo ramojno, serra 2010 de mezûn bîya.

Dimayo ke krîzê Sûrîye xo ramot û şero mîyanên vejîya hêrişê serê mehlaya Şêxmeqsûdî de zî virazîyayî. Naye ra Berîvane seba ke hunerê xo bidomno ge-ge keyeyê cîrananê xo de ge-ge zî qata binzemînî de tabloyê xo viraştê.

Rixmê Şerî de zî Berhemê Xo Ramotî

Dimayo ke çeteyê îşxalkerî yê pabesteyê dewleta Tirkî mehla gênê binê ablûqa şertê cuya seba Berîvane hîna benê giran. La Berîvane şina paytextê Lubnanî Beyrût û berhemanê xo ûca ramojnena, bi resamanê bînan ê ke eleqedar a pîya xebetêna. Menga Çele ya 2013’î de agêrena mehla û berhemanê xo pey de verdana.

Berîvane vana ke wextê bicaardişê hunerî de aye xeylî zehmetîyî antê û derheqê prosesê xoverdayîşê Efrînî de nê vatî: “Mi fek viraştişê tabloyan ra verada. Çunke bi hêrişanê îşxalkeran de gonîya rîyê sivîlan dîye, rîyê ke bi temamî mîyanê gonî de mendê. Mi a game fam kerd ke maskeya dewletanê dinya û organîzasyonanê hetkarîye kewta. Her çend ê xozaya ma bivêşnê zî darî, zeytûnî zerrîya her Efrînijan de yê.”

Pêramotişê Wendekaranê Aye yo Ewilên

Berîvana ke reyan agêraya Şêxmeqsûd û bica bîya Merkezê Kultur û Hunerî yê Cemîl Horoyî de seba ke domanan teşwîqê resimî bikero bi nameyê ‘Findê ke tarîtîye de yê’ pêramotişêk viraşt. Pêramotiş de babetanê cîya-cîyayan de xêzkerdişê 11 wendekaranê aye estê.