‘Şîîre seba gerîlayan qalkerdişê rastîye yo’

Gerîlayo HPG’yij Tolhildan Zana yo ke bala ci serê şîîran de ya vat, “Şîîre seba gerîlayan qalkerdişê pêgirewtişê bi vîrardişî û cuye yo. Gerîla çende bibo pîl, kultur-huner û edebiyat zî hende aver şino.”

Ciwanê Kurdî yê ke hemverê hêzanê kolonyalîstan de şerêkê giranî kenê, heman wextî de vîrameyîşanê xo zî nûsenê. Cuya mucadelekar û cangorîyan bi deyîran û şîîran rîpelanê tarîxî rê yena nûştene.

Gerîlayê HPG’yî Tolhildan Zana qalê cayê şîîra mîyanê gerîlayî kerd. Tolhildan Zana serra 1996 de Edene de ameyo dinya.

Zana vano ke gama o şîyêne mektebe hişmendîya Kurdîtîye ê dir bîye xurt û naye ser hewesê ê virazîyayo ke xo bido edebîyatî ser. Şaîr û hunermendê Kurdî yê ke keye de qalê înan ameyo kerdene xeylî bala Zanayî anta. Zana vano, gama ke ê şîîrê înan goşdarî kerdêne yan zî wendêne, şexsîyetê ci de vurayîşê cîyayî virazîyayê û vano, “Bêguman nê çîyî ez hîna zafa nizdê şorişî kerda.”

Tolhildan Zana vano, “Her vîsta cuye yan zî her hemrayê ke şehîd bîyê ganî rîpelanê tarîxî de bêrê nûştene. No mucadele ganî cuye de û şîîranê ma de bêro qalkerdene. Ez eşkena vajî ke mîyanê refanê gerîlayan de na babete de averşîyayîşêko rind esto. Ganî derheqê her embazanê ma yê ke şehîd bîyê de deyîrî bêrê kerdene, şîîrî bêrê nûştene û cuya înan cimatî rê bêro qalkerdene. Bin a yewe manîfestoyêk vejêno werte; no manifesto zî rastîya mucadelekaranê azadîye ya. No ma rê giran bêro zî ganî ma seba înan bikerê. Şîîre seba gerîlayan qalkerdişê pêgirewtişê bi vîrardişî û cuye yo. Naye ra terzo tewr rast ê qalkerdişê na babete yo. Bêguman nizdbîyayîşê Rayber Apoyî yê şîîre xeylî rind o. Nizdbîyayîşê Rayber Apoyî yê şîîre, macerayêka cuye ya.”

Gerîla Tolhildan Zana vano, “Tîya çîyo ke ma xo rê esas gênê; rastîya şehîdan û Rayberê ma ya. Ma nê çîyan seba xo kenê peymeyêkê cuye.”