Amed de bi tewrbîyayîşê Bedrîye Topaçe, Denîz Gunduz û Omer Barasiyî şewa wendişê şîîran ya kirmanckî ameye viraştene.

Amed de vîst rojî verê bi nameyê Morcelayê Kirmanckî de grûbêk ameye ronayene û na grûbe safî kirmancan ra pê yena. Grûbe seba ke xebatanê kirmanckî reyde mijul bibo, ameye ronayene û 2 rojî verê bajarê Amedî de şewa wendişê şîîran organîze kerde û na aktîvîteya yewine ya grûbe bî.

Şewe de Bedrîye Topaçe, Denîz Gunduz û Omer Barasiyî şîîrî wendî. Nuştox, şaîr û Serekê Beşê Kirmanckî yê Unîversîteya Artuklu Mihemed Malmîsanij, nuştox Mehmûd Nêşite û xeylê kesî beşdarê şewe bîyî. Destpêk de serê nameyê grûbe Ugur Sermîyanî xêrameyîşê meymanan kerd û qala muhîmîya ronîyayîşê grûbe kerd. Sermîyanî dima ra seba ke qisey bikero, Malmîsanij dawet kerd.

Malmîsanijî zî destpêkê qiseykerdişê xo de xêrameyîşê meymanan kerd û ronîyayîşê grûbe pîroz kerd. Malmîsanijî dîyar kerd ke na gama ereymende ya û ganî grûbêka winasî tayêna rew bironîyayêne. Qiseykerdişê Malmîsanijî ra dima Topaçe, Gunduz û Barasiyî dore reyde şîîrî wendî. Seba ke meymanî eciz nêbî mabên dîya şîîran û muzîk ame cinitene. Cinitişê muzîkî ra dima reyna wendişê şîîran dewam kerd. Peynîye de bi nameyê Xoserî de kesêk 2 şîîranê Gunduz û Barasiyî ke beste kerdbî, vatî.

Çime: Yenî Ozgur Polîtîka