Beyogluyê Stenbolî de pêramotişê " Xêzê Dêsan Qule Kenê'' hetê ekîba Gorulmuştur ra ame akerdene. Karîkaturanê pêremotişê ke hetê tepişteyan ra ameyî xêzkerdene Komeleya Kulturî yê Divrîgî de eleqeyo pîl dî. Pinar Aydinlare, endam û îdarekarê Şubeyê Stenbolî yê Komeleya Heqanê Merdiman (ÎHD), Mayê Şemeyî û zafê kesî tewrê pêramotişî bîyî. Pêramotiş ewro zî akerde yo.

Ekîba Gorulmuşturî ra Nuştox Adîl Okayî derheqê pêramotişî de zanayîşî dayî. Okayî pare kerd ke ekîba Gorulmuşturî verê cû zî di pêramotişîyê karîkaturanê tepişteyan rê akerdî û no zî pêramotişo hîrêyîn o. Okayî vat: "Pêramotişê karîkaturî goreyê pêramotişanê bînan hîna xoser ê. Çunke têkilîviraştişê bi tepişteyan zaf zor bîyo. Naye ra zaf girîng a ke babeta pêramotişî 'Azadîye' ya."

Okayî îfade kerd ke 70 eserê 22 karîkaturîstan estî û armancê înan no yo ke ê bikê ke merdimî bivînê ke binê şertanê îstîsnayan de tepişteyî senî fikirîyenê û çita virazenê. Okayî da zanayene ke amadekarîya nê pêramotişî 7 menge dewam kerd û tayê nameyan rê cewab nêame dayene û tayê eserî zî bi saya avûkatan resayî destê înan.