Merkezê çapemenî yê HPGyî derheqê çalakî û pêkewtişanê tarîxanê mabênê 29-30ê Teşrîna verêne de hayîdarîyî dayî.  Eşkerayîye de ame vatene ke gerîlayan herêma Besta ya Şirnexî, qezaya Qilaban û Geverî ya Colemêrgî û herêma Barzanî yê Başûrê Kurdistanî de çalakîyî viraştî. Nê çalakîyan de tewr tay 13 leşkerî ameyî kiştene. Xêrcê nê HPGyî ard ziwan ke hêrişê dewleta tirkî yê hemverê wareyanê gerîlayan zî dewam kenê.

BESTA DE OPERASYON Û ÇALAKÎYA GERÎLA

Eşkerayîya bidetaye ya Çapemenîya HPGyî wina ya:

“Roja 29ê Teşrîna verêne saet 12.00 de artêşa tirkî ya îşxalkare wareyanê Besta Meyremê, Girê Hêliz, Girê Sêva û Besta Bluzera yê pabesteyê herêma Besta ya Şirnexî yê de operasyonêk viraşt.

Heman roje saetanê şanî de hêzanê ma çarçiwaya Hemleya Şorişgêre ya Şehîd Delal Amed û Şehîdanê Besta de hemverê yewîyanê ke wareyê Girê Sêva de vejîyabî operasyon çalakîyêk viraşte. Hêzê dişmenî di hetan ra bi hawayêkê tesîrdarî ameyî panayene, çalakîye de 2 leşkerî ameyî kiştene. Çalakîye ra dima herême hetê artêşa tirkî ya îşxalkare ra bi obus û topanê hewanî amî bombardûmankerdene, roja 30ê Teşrîna verêne bê netîce herême ra ancîyaye.”

QILABAN DE LEŞKERÊ TIRKAN GÎRÎYAYÎ BINÊ GULEVARANÊKÊ KESIFÎ

Roja 29ê Teşrîna verêne de saet 17.15 de hêzanê ma hemverê leşkeranê tirkî yê îşxalkaran de ke qilê Kilikî yê nizdê qereqola Tepê Çeta ya pabesteyê qezaya Qilabanî ya Şirnexî bica kerdîbî çalakîyêk viraşte. Leşkerê dişmenî gîrîyayî binê gulevaranêkê kesifî, hûmara leşkeranê kişte û birîndaran nêamî tesbîtkerdene.  

GEVER DE DI HETAN RA ÇALAKÎ

Roja 30ê Teşrîna verêne saet 11.00 de hemverê artêşa tirkî ke qilê Şehîd Zerdeştî yê pabesteyê Geverî yê Colemêrgî de xebata viraştişê rayîrê asayîşî kerdêne çalakîyêk viraşte. Hêzê dişmenî di hetan ra ameyî panayene, çalakîye de 2 wesayîtê dozere ameyî îmhakerdene û qaso ke tesbît bi 5 leşkerî ameyî kiştene. Çalakîye ra dima ware hetê artêşa tirkî ya îşxalkare ra bi obus û topanê hewanî ame bombardûmankerdene  

BARZAN DE MEWZÎYÊK AME ÎMHAKERDENE, 6 LEŞKERÎ KIŞÎYAYÎ

Roja 30ê Teşrîna verêne saet 13.00 de hêzanê ma hemverê artêşa tirkî ya îşxalkare ke xo qilê Xwedê yê herêma Barzanî ke kewena erdanê Başûrê Kurdistanî de bica kerdîbî çalakîyêk viraşte. Mewzîyêkê dişmenî yo ke qilî ser o bi bi temamî ame îmhakerdene û qaso ke tesbît bi 6 leşkerî ameyî kiştene. Çalakîye ra dima ware bi obus û topanê hewanî ame bombardûmankerdene 

GARÊ, ZAP Û XAKÛRKÊ SER O HÊRIŞO HEWAYÎ

Teyareyanê artêşa tirkî ya îşxalkare hemverê Wareyê Pawitişî yê Medya de hêrişê hewayîyî viraştî. Detayê hêrişanê hewayîyan wina yê:

Roja 28ê Teşrîna verêne saetanê mabênê 19.00 û 19.30 de teyareyanê şerrî dewê Bêbazê, Şikêra û Şirya yê pabesteyê şaristanekê Çêmanke yê herêma Garê bombardûman kerdî. Netîceyê bombardûmankerdişan de rez û baxçeyê şarê herême zirar dîyî.

Roja 30ê Teşrîna verêne saet 17.15 de wareyê Werxelê ya herêma Zapî, mabênê saetanê 23.00 û 23.30 de zî Gundê Filleha û Qilê Cehnemî hetê teyareyanê şerrî ra ameyî bombardûmankerdene. Heman roje de saet 20.30 de zî teyareyanê şerrî Dereyê Xakurkê ke pabesteyê herêma Xakurkê yo û dormeyê ci bombardûman kerdî.