Qerarê hukmatê AKPyî yê wezîfe ra girewtişê 259 muxtaran hewna ke rojdem de yo, bicaardişê hemverê muxtaranê qezaya Elbakî ya Wanî bale ancenê. AKPyo ke nêwazeno Elbak de heman çîyî biciwîyo bi heme sazîyanê dewlete û hêzê xo dest bi xebata weçînitişî kerda.

XEBATA BI HÎRÊ MERHELEYAN

Sey herêmêka pîlote planêkê xebate yo winayên ameyo amadekerdene:

* Do hewl bêro dayene ke kes yan zî kesî hetê walîtî û qeymeqamîyan re bêrê îknakerdene.

* Êyê ke îkna nêbê hetê leşker û qorucîyan ra înan ser o zextî bêrê kerdene.

* Eke paştgêrîya HDPyî bidomnê na rey zî do dadgerî bikewo dewre, derheqê ê kesan de prosedurê binçimgirewtiş û tepiştişî bêro dest pêkerdene.

 DEWA ELBESÎ DE BINÇIMGIREWTIŞÎ

Seva ke dewa Elbesî (Ozpinar) se ra 90 reyî dabî HDPyî AKPyî, na dewe de dest bi binçimgirewtişan kerd. Leşkeranê ke eşt di dewan ser dewijan ra tayênan mîyanê hewteyêk de hîrê reyî girewtî nezaret. Ame zanayene ke lîsteya binçimgirewtişan hetê qorucîyan ra amîya amadekerdene.    

WALÎ Û QEYMEQAM ÇINYÊ

Parlamenterê HDPyî yê Wanî Mûrat Sarisaçî vat ke ma Elbak de her weçînitişî de benê yewin, naye ser muxtarî ameyê tasfîyekerdene, tehdît, zext û binçimgirewtişî yenê kerdene. Saraçî ard ziwan ke AKPyî bi vatişê ma do „qeyûm tayîn bikerê“ vinîkerdişê xo îtîraf kerdo. Qiseykerdişê xo wina dewam kerd: „Walî û qeymeqamî zî sey serekê şaristan û qezayanê AKPyî xebetênê. Na dewlete hendî qaydeyanê xo zî bica nêana û bîya pûçe. Îqtîdarê AKP-MHPyî zî do heme rayîran mubah bivînê û seva ke HDP qezenc mekero çi destê înan ra bêro do bikerê.“