Awankerdoxanê PKKyî ra Sakîne Cansize Dêrsim de mezela xo ser ameye vîrardene. Parlameterê  HDPyî Semra Guzele, Dersim Dage,  aktîvîstê  TJAyî, hemserekê HDPyî yê Dêrsimî Ozlem Toprake û Hidir Çiçeke û organîzasyonê  HDPyî yê bajarî tewrê ci bîyî

Vîrardişo ke binê ablûqayê polîsan de ame viraştene de mezele ser ê vilîkî ameyî ronayene û mûmî ameyî tafînayene.

Awankerdoxanê PKKyî ra Sakîne Cansize ya pîya temsîlkara KNKyî ya Parîsî Fîdan Dogane û endama têgêrayîşê ciwanîye Leyla Şaylemeze û hîrê cinîyê şorişgêrî endama meclîsê DBPyî Seve Demîre, endama KJAyî Fatma Uyare û hemsereka Meclîsê Şarî yê Silopî Pakîze Nayire yê ke wextê xoverdayîşê xoîdarekerdişî de Silopî de ameyî qetilkerdene, ameyî vîrardene û sozê bicaardişê waştişanê înan ame dayene.

Qiseykerdişan de bale ancîya muhîmîya rolê Sanîke Cansize ser û ame vatene ke ewro cinîyê Kurdî xeta Cansize de her cade rayberîya mucadeleyî kenî û do heta serkewtişî xoverdayîşê înan dewam bikero.