Termînê neweyî yê perwerdeyî de bi deshezaran namzedê mamostayîye, bi qanûnanê kêfî yê tehqîqatê ewleyîye, mamostatîya peymanêne, mamostatîya ucretine û sewbîna yenî asteng kerdene. Nê mamostayê ke yenî asteng kerdene ra yew zî mamostayê edebîyatî Halîl Eren o. Eren dewa Oneqî ya qezaya Tetwanî ya Bedlîsî de cuyeno.

Erenî waştêne bibo mamoste û seba ci unîversîteya 4 serreyî qedêna. Mamostayo ke tayînê ci nêame viraştene, agêrayo dewa xo û nika dewe de şiwanetîye keno. Eren vano ‘ez na dewe de bîya’ û wina domneno: “Wexto ke ma doman bî, ma şîyêne mekteb û dima ra ma şîyêne heywanan ver. Firsendê mi yê şîyayîşê derxaneyî nêbi. Mi ko, gir û zinaran ser o amadekarîya ezmunî kerde. Meslegê mamostatîye Tirkîya de verê cû zaf erjaye bi, labelê nika merdim xo bi xo vano ‘gelo wendişê mi veng şi?’. No mesleg merdimî rê xeyalan qedexe keno.”

Erenî dewamê qiseykerdişê xo de va ‘sîstemê perwerdeyî yê Tirkîya hertim merdiman erzeno mîyanê musabeqeyan û nê musabeqeyan ra ti kes sernêkeweno’ û wina qedêna: “Xeylê hetê başî yê şiwanetîye estî. Labelê mi hende wend û ez wazena ke tayê wendekarê mi bibî. Labelê ez nika nê karê xo ra zî hes kena.”