Îdarekarê MÎTî yo tepişte Aydin Gunelî vat ke serra 2017 de ê Nîzamettîn Taşî dir pêvînayîş viraşto, serekê Daîreyê Operasyonî Mehmet Levent Turkgucu û serekê Daîreyê Koordînasyonî yê MÎTî Yusuf Serkan Paksoy zî tewrê pêvînayîşî bîyo.

TAŞÎ ÎDAREKARANÊ MÎTÎ DIR DI REYÎ PÊVÎNAYÎŞ VIRAŞT

Îdarekaranê payeberzan ê MÎTî ra Aydin Gunelo ke serra 2017 de menga Tebaxe de Başûrê Kurdistanî de hetê hêzanê HPGyî ra amebi tepiştene vat ke Taş û îdarekarê MÎTî serra 2017 de 2 reyî Başûr de ameyê têhet. Pêvînayîşî bi mabênkarîya organîzasyonê îstîxbaratê PDKyî Parastinî ameyî viraştene. Cayê pêvînayîşan zî merkezê Parastinî yo ke şaristanê Seleheddînî de bîyo. Nîzamettîn Taşî nê pêvînayîşan de derheqê ‘hemverê PKKyî de ronayîşê partîyêka newî’ de îdarekaranê MÎTî rê proje pêşkêş kerd û no proje hetê MÎTî ra ame tesdîqkerdene.

Îdarekarê MÎTî Gunelî derheqê ê kesanê bînan ê ke PKKyî ra remayê û kewtê xebatanê ke hemverê mucadeleyê azadîya şarê Kurdî mîyan zî hayîdarîyî dayî. Goreyê hayîdarîyanê ê mîyanê ê kesanê ke wazenê Vakurê Kurdistanî de  hemverê Têgêrayîşê Azadîya Kurdan de partîyêka alternatîfe ronê sereyê înan de Nîzamettîn Taş esto.    

MA SEREKÊ DAÎREYÊ OPERASYONÎ YÊ MÎTÎ MEHMET LEVENT TURKGUCUYÎ DIR AMEYÎ TÊHET

Gunelî wina vat: ‘’Nîzamettîn Taş ê bi kodê Botanî waştişê pêvînayîşî ma rê şirawit. Waştişê ci bi rayîrê organîzasyonê îstîxbaratî yê PDKyî Parastinî resa ma. Ma ameyî Hewlêr û merkezê Parastinî yê Seleheddînî de pê dî. Taşî pêvînayîş de sere de halê Tirkîye û Kurdistanî ser o qisey kerd û dima ra ard ziwan ke wazenê partîyêk ke PKKyî rê bibo alternatîfe virazê. Dima ra Taşî vat PWDyo ke înan bi Osman Ocalanî û Hidir Sarikayayî dir ronabi nêresayo amacê xo.”

Taş derheqê partîya newî de zî nînan vano: “Ma wazenê partîyanê sey Hak-Par, PAK û PWDyî bêrê têhet û partîyêka legale ronê. Ma bi serkêşîya PDKyî rew ra yo seba nê xebatan kenê. Amacê na partî şikitişê tesîrê PKKyî yo. Aşîret û qorucîyê ke do paştî bidê ma estê, yê ke PKKyî ra visyayê estê. Ma do pîya xebatanê organîzasyonî raye ra berê.” Taş MÎTî ra wazeno ke kadroyanê ke do bêrê hadrekerdene Tirkîye de hetê huqûqî ra raştê probleman nêrê û înan pawitişê înan wazeno. Taş vano ke prosesê ronayîşê partîye de tayê problemî estê, la programê partî ameyo hadrekerdene.   

MÎTÎ RÊ RAPOR AME PÊŞKÊŞKERDENE

Goreyê îdîaya Gunelî îdarekarê MÎTî yê ke agêrayî Enqere merkezê xo rê raporêk derheqê pêvînayîşî de pêşkêş kerd. Rapor de vajîyeno ke projeyê Nîzamettîn Taşî hewna merheleya destpêke de yo, ganî xebatê ê bêrê teqîbkerdene, lîsteya ê kesanê ke do bêrê pawitene ser o vinderê û îrtîbat bêro dewamkerdene.

Menga Hezîrane ya 2017î de yewna pêvînayîş yeno viraştene. No pêvînayîş zî ancî serê organîzasyonê îstîxbaratî Parastinî ra yeno viraştene. Serekê Daîreyê Koordînasyonî yê MÎTî

Yusuf Serkan Paksoy zî tewrê nê pêvînayîşî beno. Gunelî vat ke ê zî mîyanê ê pêvînayîşan de ca girewto, la seba ke ameyê tepiştene xebatê viraştişê partîya newî ameyê vindarnayene. Gulenî vat dimayê tepişîyayîşî ra o nêzano ke xebatê viraştişê partî çi halî de yê.   

Selahîyetdarê MÎTî Gulenî peynî de vat: “Kemal Burkay hetê îradeyê sîyasîyî ra arîya bi Tirkîye. Ame waştene ke vajê hemverê PKKyî de partîyêka ma ya alternatîfe esta. La a xebate zî bi ser nêkewte, nîmcet mende.”

Selahîyetdarê MÎTî yo bîn Erhan Pekçetîno ke heman babete ser o qisey kerd vat ‘’Serek Serkanî ma ra waşt ke ma partîya newî nizd ra teqîb bikerê. Serek Leventî zî qalê abirnayîşê 300 hezar dolarî seba ronayîşê partîye kerdêne. No pere do seba mesrefanê ronayîşê partî biameyêne xerckerdene.”

SE BIBI?

Îdarekarê MÎTî Aydin Gunel û Erhan Pekçetîn seba ke hêrişanê hemverê îdarekaranê PKKyî koordîne bikerê şibî Başûrê Kurdistanî û menga Tebaxe 2017 de nizdê şaristanê Silêmanîye de hetê hêzanê HPGyî ra bi operasyonêkê taybetî ameybî tepiştene. Dîmenê tepişîyayîşê îdarekaranê MÎTî menganê vîyarteyan de ameybî weşanayene.

MÎTîyî Gunel û Pekçetînî derheqê qirkerdişê Parîsî yê 9ê Çile 2013î de zî hayîdarîyê muhîmî dayîbî. Înan bi hawayêkê bidetayî îtîraf kerdibi ke senî qirkerdiş hetê merkezê MÎTî ra ameyo organîzekerdene.