Rayraşîyayîşan de çew beno şahîdê rîyanê neweyan û vîrardişanê nêvîrakerdeyan. Gerîlayê azadîye Cîhan Ereno ke 1997 de Şam de cayê Rayberê Şarê Kurdî Abdullah Ocalanî de mendo vîrardişê xo û çîyê ke hîs kerdî ardî ziwan.

Eren dîyayîşê verênî yê Ocalanî wina qal keno:

‘‘26ê Gulane ya 1997î de ma ravêrtî Şamî, sehaya Rayberîye. Ma hemeyan Rayberîye pawitêne. Bi heyecanê girdî çimê ma berî de bî. Embazêkê ma yo şermok bibi. Rayberîye gama ke kewt zere hêver destê ey girewt û va ‘ax ciwanê ma Kurdan dişmenî şima vistî çi hal‘ embaz nas nêkerdêne la cade bi sanîyan fam kerd.

Wextê perwerdeyî de her hetî ra embazî ameyêne Şam. Rayberîye tim vatêne ‘sere de dewleta Sûrîye xeylî hetî tîya de bîyayîşê ma hezm nêkenî û semedê vernî girewtişê nê perwerdeyî çiko dest ra yeno kenî. Coka nê firsendî hol bişuxulnên.‘ No semed ra ez vîrardişê ê perwerdeyî ra hêz gêna.‘‘

Eren wina dewam keno:

‘‘Ma bi Rayberîye pîya roniştêne. Destê ci de radyoyanê verênan ra radyoyêk estbi xeberî goştarî kerdêne. Hetêk ra zî televîzyonê tirkan teqîb kerdêne. Hetê bînî ra zî ma rê yew bi yew persî persayêne. Mi vatêne no nê pêrune senî heman wextî de keno.

O dem de operasyonê Zapî bibi. Leşkerê Tirkan derbeyê girdî werdîbî û peyser agêrayîbî. Televîzyonan de bi nameyê artêşa Tirkî ameyêne qiseykerdene. Rayberîye verê xo açarna mi û va ‘embaz no çi vano‘ mi va Rayberê mi vano ke ma operasyonî ra netîce girewto. Va ‘beno ke wina vajo‘ naye ser a ez bîya rehet. Mi pawitêne ke çîyeko cîya vajo.

Mi waştêne ke ez Rayberîye hîna hole nas bikî.  Mi çend o nas kerdêne mi dîyêne ke dişmen senî heqê ey de xeberanê zûran vila keno.‘‘