Hemserekê DBPyî Keskîn Bayindirî derheqê tecrîd û grevê vêşanîye de ANFyî rê qisey kerd.

Bayindirî ard ziwan ke Îmrali de sîstemêko xoser esto û vat: ''Zîndanê Îmrali de huqûqçin o. Nika zî yeno waştene ke no sîstem pêro zîndanan ra bêro vilakerdene. Îqtîdar 18 serran ra nata goreyê menfaatanê xo nêzdîyê tecrîdî beno. AKP-MHP bi rayîrê tecrîdî wazenê rejîmê xo yê neweyî ronê. Çinkerdişê tecrîdî rijnayîşê faşîzmî yo Seke prosesê çareserîye de ame dîyene Birêz Ocalan eşkeno pêro meseleyan çareser bikero.La îqtîdarî seba ameyoxê xo 5ê nîsana 2015î ra dima proses xera kerd û tecrîd kerd tûjêr.

Bayindir îfade kerd ke pêro dinya ser o yew mîsalo bîn ê Zîndanê Îmraliyî çin o û vat: ''2015î ra dima tecrîd ame xorinkerdene. Birêz Ocalan vengê komelî yo. Birêz Ocalan bi fikr û têgêrayîşê xo  verê şaranê Kurdîstan û Tirkîya roşnî keno. Mîsalê ney zî modelê Rojawanî yo. Şexsê Birêz Ocalanî de komel yeno tecrîdkerdene. Meseleya kurdan zî meseleya verêne ya Tirkîya ya. Heta ke meseleya kurdan nêra çareserkerdene tecrîd zî nêno şiknayene. Ganî rêxistin, partî, dezgeh û şarê kurdî vera tecrîdî pîya têkoşîn bikerê.''

Bayindirî bale ante grevê vêşanîye yê tepişteyan ser û vat: ''Tepişteyî cara binê rewşêka girane de yê. Înan bi îradeyê xo dest pê grevê vêşanîye kerd. Waştişê tepişteyan waştişê pêro merdimîye yê. Ganî ma paştî bidê tepişteyan. Ganî ma teber de zî milbi mil bibê.  Waştişê tepişteyan meşrû û huqûqî yê. Seba ke tecrîd bêro wedaritene, waştişê tepişteyan qebul bibê û binpaykerdişê heqanê înan biqedê ma înan reyde têbigêrê.''