Vera tepiştişê Hemsereka Kongreya Komelê Demokratîkî (KCD) Leyla Guven nêrazîbîyayîşî dewam kenê. Xeylêk bajaranê Kurdîstanî û Tirkîya de çalakîyî ameyî kerdene.

Rêxistina HDPyî ya Dêrsimî bi eşkerayîya çapemenîye rehînegirewtişê Guvene protesto kerd. Hemsereka HDPyî ya Dêrsimî Nurşate Yeşîla ke eşkerayîye de qisey kerd tepiştişê Guvene sey vera heme kurdan û muxalefetî hesibna û vat: ''KCD muxatabê muzakerayanê demokratîkan û cehdkerdişê haştîye û çareserî yo. Ê bi krimînalîzekerdişê KCDyî karo betal kenê. Çîyê winayên zaf rey ameyî ceribnayine û çirey netîce nêgirewt. Heme hêrişê vera mucadeleyê heq û huqûqî yê kurdan hetê şarî ra tim cewabê xo girewto.''

Rêxistina HDPyî ya Çewlîgî zî bi bi eşkerayîyêke vera tepiştişê Guvene nêrazîbîyayîşê xo ramojna. Eşkerayîya ke verê berê banê HDPyî de ameye dayene de Hemserekê HDPyî yê Bajarî Veysel Kayayî qisey kerd. Kayayî vat: ''Rejîmê qesre ke merhaleya rijnayîşî de yo wazeno ke bi dişmenîya vera kurdan payra bimano. Seba ke muxalefetê HDPyî zor dano înan, huqûq binpay kenê û pê hêrişan wazenê îqtîdarê xo bidê domnayene. Bi zîhnîyetê bêhuqûqî Guvene yena cezakerdene ke ma nayî qebul nêkekê.''

Reyna Semsûr,Bedlîs, Adana, Mersin, Îzmîr û xeylêk bajaranê bînan ê Kurdîstan û Tirkîya de bi eynî waştişî çalakîyî ameyî kerdene û mesajê pîlkerdişê mucadeleyî ameyî dayene.