Fermandaranê Qerargehê Merkezê Pawitişê Şarî ra Bawer Dersim beşdarê programê taybetî yê Medya Haber TVyî bi û alozîya Başûrê Kurdîstanî ercnaye.

Qiseykerdişê Dersimî ra beşêk wina yo:

''Alozîyê Başûrî verê çiman de yê. Nê alozîyî destkewteyanê kurdan visnenê binê tehlukeyî û sebebê nînan zî polîtîkaya PDKyî ya. Vera ma planê tasfîye dewam kenê. Beşêkê PDKyî vera ma mîyanê têgêrayîşan de yo. Ma îrade û îdareyê Başûrê Kurdîstanî rê hûrmet kenê û seba pawitişê nê îradeyî ma vera DAÎŞî zî şer kerd. Aya ke îradeyê Başûrî nêşinasnena dewleta tirke bi xo ya. Xora wextê referandumê xoserîye yê Başûrî de tewirê dewleta tirke amebi dîyene. Meseleyê Başûrî zî hetê dewleta tirke ra ameyî afirnayene.

Ma venga PDKyî danê ke tewirêkê raştikênî bimojno. Tewiro raştikên vatişê 'PKK çimeyê meseleyan o' nîyo. Kek Mesûd Barzanîyî wextê hêrişanê DAÎŞî de gerîlayê Mexmûrî, fermandarî zîyaret kerdî. Tewiro raştikên no yo. Oyo ke do şarê kurdî ser bivisno û tehlukeyan ra bipawo no tewir o.

Başûr de bi desan baregehê tirkan estê, konvoyê pêşmergeyan de hêzê dewleta tirke şinê. No xizimkarîya dişmenan a.

Pêşmergeyê Gulane û Pêşmergeyê Roje vejîyenê verêma, şer kenê. Na mesele de ma bi mesuldarî têgêrenê. Ma zanenê ke şerê zereyî yê kurdan do têna dewleta tirke rê xizmet bikero. Dewleta tirke bi israrî pê destê PDKyî wazena şer veja la ganî kes planê dewlete ser o nêşoro.

Eke ê vanê 'cara PKK qels bîyo ma do hêrişê ci bikerê û ey tasfîye bikerê' wa bizanê ke şaşîyêka pîle kenê. Tasfîyeya PKKyî mumkîn nîya. PKK şar o. Wa kes hesabêkê şaşî nêkero û sebrê PKKyî test nêkero! Ma bi nê hawayî nêzdîyê PDKyî benê. Wa kes sebrê ma sey qelsîye nêvîno.

Bira ma eşkera ya. Ma do qet vera hêzêkê kurdan şer nêkerê. Bira ma ya diyîne zî wina ya ke kam beno wa bibo eke hewce bibo ma do bi xurtî cewabê ci bidê. Seba ke ma bi hawayêkê nermî têgêrenê wa kes nêvajo na qelsî ya. Na hîsgerîya ma ya seba yewîya neteweyîye ya kurdan a.

Şero muxtemel do kesî rê fayde nêkero. Eke şerêk vejîyo no şer do tesîrê pêro parçeyanê Kurdîstanî bikero. Wa kes hesabanê şaşan nêkero, wa PKK raşt fam bikero. Ma tim terefgîrê çareserîye yê, ma terefgîrê dîyalogê mabênê kurdan ê. Ma venga her kesî danê ke bi dîyalogan meseleyan çareser bikerê. Ma qet nêwazenê şerêko qij zî biqewimo. Ma seba naye xîret kenê. La eke bêro heta qirikê ma ma do bêveng zî nêmanê.

Ma venga her kesî danê ke na mesele de bi mesuldarî têbigêrê. Ma pabeyê ci yê ke şarê ma bi na raştîye tewirêkê xurtî bimojno. Nê esasî ser o ma venga şarê xo kenê.''