Gerîlayê HPGyî Serhat Kaya û embazêkê ci 18ê tebaxa 2019î de herêma Talî ya Colemêrgî de hêrişêkê hewayî de şehîd bibî. 16 mengî yo ke cenazaya Kayayî nêdîyena keyeyê ci. Keyeyî seba cenaza muracatê serdozgerîye kerd la reyna zî selahîyetdaran cenaza nêdaye keyeyê Kayayî. Keyeyî wina fikirîyeno ke cenazaya lajêînan ameya parçekerdene.

Birayê Serhatî Kenan Kayayî ard ziwan ke înan muracat kerd la seba DNA înan ra gonîye nêameye girewtene. Kayayî îfade kerd ke înan cendirmeyan rê zî waştişname nuşt la cendirmeyan îdîa kerd ke herême 'qedexekerde ya' û ê nêeşkenê cenaza bigêrê. Kayayî pare kerd ke herêma bombakerde de 2 baregehî estê û nêzdîyê dewa Talî ya. Kayayî eşkera kerd ke dewijanê Talî tay parçeyê bedenê merdiman dîyî û cayêk de ê kerdî binê erdî.

Kayayî venga ê kesanê ke îdîa kenê domanê înan ameyî 'remnayene' û verê bînaya HDPyî de ronişenê, da û vat: ''Cenazaya birayê mi qasê 30 kîlometreyan mi ra dûrî ya la ez nêeşkena cenaza bigêra. Cenazaya mi nêdanê mi. Ganî na raştîye bivînê, pê kayan mexapîyê. Ez vana qey hêrişê hewayî de cenazaya birayê mi ameya pareçekerdene. Tira destêk zî bimano ma cenazaya xo wazenê. La ê nêverdenê. Na merdimîye nîya. Se serrî zî derbaz bibê ma do wayîrê birayê xo vejîyê.''