17 bajaran ra 287 rêxistinanê  sîvîlan û demokratîkan bi amancê bale biancê serê çalakîya grevê vêşanîye ya Leyla Guven a ke 150 rojî yo grevê vêşanîye de ya û bi hezaran girewteyanê sîyasîyan ê hepsxaneyan de grevê vêşanîye de yê,  qezaya Surî ya Amedî de, hotelêk de eşkerayîya hempare daye. Sazgehan salona de pankarta gird a ke ser o “Ma vera merdişî de heqa ciwîyayîşî pawenê” nuşto akerde û bi nameyê sazgehan vervatoxê Demî yê Platformê Ked û Demokrasî  Mehmet Şirîn Gurbuzî eşkerayîye daye.

Gurbuzî da zanayene ke krîter û têkoşînê  sazgehan ê sîvîlan awankerdişê demokrasî û haştîya cimatkî ya û vat, “Wazenê ke heme cimatî bi zextan bidê bêvengkerdene, verê heqanê bingeyîn ê merdimîye bigîrê. Na rewşa antîdemokratîk a ke huqûqî ra dûrî kewta, ma kena mîyanê qesawetan. Hemberê nê bîyayîşan de hetê hemsereka KCD’yî birêze Leyla Guvene ra grevê vêşanîye ame destpêkerdene û na çalakîye welat de û teberê welatî de hetê bi hezaran kesan ra yena dewamkerdene. Rewşa çalakwanan resta sewîyeya krîtîke. Na xeternake reyde çi heyf ke zîndan ra xeberê merdişî yenê.  Bitaybetî zî bêvengîya îqtîdarî qesawetê ma kenê zêdetir. Eke proses bi nê hawayî dewam bikero çi heyf ke merdişî zêdetîr benê. Na rewşe zerarêk danê haştîya cimatkî û demokrasî. Goreyê zanayayîşê ke avûkatanê çalakwanan û keyeyan înan dayê, çalakwanî êdî restê sewîyeya krîtîke. Tayê hepisxaneyan de vîtamînê B1’î, sole û şeker nêno dayene.”

Gurbuzî, peynîya eşkerayîya xo de vengdayîş bi serdestan kerd û win dewam kerd, “Ma sazgehê ked û demokrasî vengdayîş kenê ke seba haştîya cimatkî, goreyê  berpirsîyarîya xo ya exlaq û wijdanî her kes bikewo mîyanê têgêrayîşî. Seba haştîya cimatkî  û heqa cuye ma vengdayîş bi îqtîdarî kenê ke na perse goreyê erjanê huqûqî çareser bikero.”

Platformê Ked û Demorasî yê Mêrdînî zî bi eynî amanc eşkerayîye daye. Endam û temsîlkarê Platformî  banê Platformê Beşê  KESK'î yê Mêrdînî de eşkerayîye daye. Bi nameyê platformî Vervatoxê Demî yê Platformî Mustafa Bozanî eşkerayîye daye. Bozanî, vengdayîş bi hukmatî û dewlete kerd û waşt goreyê huqûqê mîyanneteweyî  tê bigêrê.