Çeteyê DAÎŞ’î 3’yê Tebax a 2014’î de hêriş berd serê Şengalî. Bi hezaran Kurdê Êzidîyî nêçareyîye ra keyeyê xo caverdayî, bi hezaran cinî û domanî hetê çeteyanê DAÎŞ’î ra ameyî remnayene. Zafaneyê nê cinî û domanan bazarenê koleyan de ameyî rotene.
Qirkerdişê çeteyanê DAÎŞ’î yê serê Şengalî sey Fermanê 74’ine kewt tarîxê şarê Kurdî.
Xeylî cinî û domanê ke hetê çeteyan ra ameyî remnayene dima ra hetê hêzanê YPG-YPJ û YJŞ’yî ra ameyî xelesnayene û ê ameyî dayene bi keyeyanê înan, pîya bi nê hewna zî aqûbetê xeylî cinî û domanan bewlî nêyo.
Verê 5 serran çeteyanê DAÎŞ’î gama ke hêriş berd serê Şengalî, şerwananê YPG, YPJ’yî bi lezgînî mudaxele kerd û korîdorê mabênê Rojawan û Şengalî akerd. Şerwanan şar cayanê biasayîşan de bica kerd, gerîlayanê HPG-YJA Starî vernîya qirkerdişêkê pîlî girewte.
Şarê Şengalî nika organîzasyon û pawitişê xo bica ardê…
3’yê Tebax a 2014’î de, hêrişê çeteyanê DAÎŞ’î ra dima, qismêk ke kewto kameraya ANF’yî ma şima dir pare kenê.
