Qezaya Ebexî ya Wanî de serra 1976î de erdlerz qewimîyabi û erdlerzî ra dima zî binê erdî de gazê karbondîoksîtî virazîyabi. No gaz weşîya taxa Beyazitî rê gefêkê pîlî waneno.

4 serranê peyênan de gazê metanî zî zêdîyeno. Roniştoxê taxe pabeyê çareserîyêk ê. 2019 de selahîyetdarê Mudirîya Teknîk û Cigêrayîşî yê Kanî raporêk amade kerdbi û dabi zanayene ke no gaz jehrin o. Rixmê naye zî qet yew tedbîr nêame girewtene.

Roniştoxa taxe Zubeyde Trak vat: ''Erdlerzî ra nata na boye yena. Serê ney de bînayî virazîyayî. Ma nêwaşt bînayî tîya de virazîyê la selahîyetdaran goş nêda ma. Zimistanan ma bıya ra nêeşkenê keyeyan de ronişê.''

Hakan Yildizî zî ard ziwan ke erdlerzî ra dima Ebex de bêcigêrayîşan bînayî virazîyayî û vat: ''Rapor de vajîyeno ke tîya de rewşa bitehluke esta la tedbîrî nêgêrîyenê. Boye ra ma nêeşkenê heywanan weye bikerê û çîyêk biramê. Weşîya ma vera bena xirabêr.''

Endamê Odeya Muhendîsanê Kîmya Umît Canî derheqê mesele de nê agahîyî dayî: ''Gazê metanî serê xeta fayê erdlerzî de yo. Beno ke siba nê bîr no gaz biteqo. No gaz beno sebebê nêweşîyanê sey KOAH. Roniştoxan muracatê ma kerd. Ma do xebetanê xo bikerê.''