Seba azadîya Rayberê Şarê Kurdî Abdullah Ocalanî Kampa Multecîyan a Rûstem Cûdîyî (Mexmûr) de, çalakîya nobete yena kerdene. Çalakîkeranê nobete derheqê armancanê çalakîya xo de ANFyî rê qisey kerd.

Dayîke Kerîma Qewalî pare kerd ke ê do çalakîyanê xo teyna bi çalakîya nobete sînordar nêkerê û çalakîyanê rayraşîyayîş û mîtîngî zî bikerê. Dayîke Kerîma Qewalî vat: ''Ma Serekê xo mîyanê çar dîwaran de nêwazenê. Ma sey şarê kurdî û cinîyan ê kurdan heta peynî hetê Serekê xo, gerîlayan û şehîdanê xo de yê. Wext wextê azadîya Rayberîye yo. Ganî ciwanî seba azadîya Rayberîye dest pê çalakîyan bikerê. Ganî pêro dewlete seba Rayberê ma têbigêrê. Heta ke ma Rayberîya xo ra agahîyêke bigêrê ma do şewe û roje payan ser de bibê.''

Mamosta Xebat Pîranî îfade kerd ke armancê çalakîya înan azadîya Rayberê Şarê Kurdî ya û vat: ''Senî ke Nelson Mandela 25 serran ra dima ame azadkerdene ganî Rayberê ma zî azad bibo. Ganî Mehkemeya Heqanê Merdiman a Ewropa (MHME) wayîra heqê hêvî yê Rayberê Şarê Kurdî vejîya. Ganî Konseya Ewropa, MHME, CPT û pêro dezgehî azadîya Rayber Apoyî rê destek bidê û dewleta tirke rê teda bikerê. Nê welatê ke xo rê vanê demokrat û edîl ganî wayîrê erk û mesuldarîyanê xo vejîyê.''