Bajarekê Pêrî yê pabesteyê Mazgêrtê Dêrsimî de vizêr roja 6ine de çalakîya vera qeyûmî dewam kerde. Hemşaredara Gimgimî ya Mûşî Ulku Karaslan, endamê Meclîsê Şaredarîye, endamê Merkezê HDPyî Ferhat Yildiz û xeylî hemwelatijî tewrê çalakîye bîyî.

Ulku Karaslana ke çalakîye de qisey kerd qeyûm sey hêrişê vera îradeyê şarî name kerd û vat: ''Na polîtîkaya hêrişkare do çirey ser nêkewe. Bi seserran o ke îradeyê kurdan nêno naskerdene. Bi polîtkaya asîmîlasyonî yeno waştene ke kurdî bêrê çînkerdene.  La kurdî bi xoverdayîşî wayîrê îradeyê xo vejîyene û çirey milê xo çewt nêkenê. Êyê ke bi nê adirî kay kenê yê do xo nê adirî de bivêşê. No adir tewr peynî de do înan zî bivêşno. Îqtîdarê ke vera îradeyê şaran vindertî vînî kerd do AKP zî vîn bikero.''