Grevê vêşanîye yê biagêrayîşî yê Wanî dewam keno. Grevê vêşanîye yo ke banê HDP’yî yê qezaya Rêya Armûşî de dest pêkerd, banê HDP’yî yê bajarî de dewam keno. Grûba 4’ine ya ke çalakîya grevî dewr girewte, da zanayene ke heta tecrîd nêro wedaritene ê do çalakîya xo dewam bikerê.

Ma pîya vernîya merdişê merdiman bigêrê

Rahîme Ataman a ke banê HDP’yî yê Wanî de grevê vêşanîye de ya, da zanaye ke tek rayîrê Tirkîya yê kaosî ra vejîyayîşî esto, wedaritişê tecrîde Îmraliyî yo. Atamane ard ziwan ke bi mîlyonan merdimî bi nê waştişî çalakîyan virazenê û 7 hezar merdimî zî hepsixaneyan de bedenê xo dayo verê grevê vêşanîye. Atamane vengdayîş bi şarê Tirkîya kerd ke bi berpirsîyarîye tê bigêro. Atamane ard ziwan, înan zî seba nê amancî dest bi çalakîye kerdo û bi taybetî vengdayîş bi sendîkayan, baroyan, hêzanê demokratîkan û şarî kerd û vat, “Ma pîya vernîya merdişê merdiman bigêrê.”

Waştişê înan waştişê ma yê, coka ma çalakîye de yê

Haci Kîyeyî zî ard ziwna ke, hewcadarîya Tirkîya bi çareserî û dîyalogî esta. No sebeb ra ganî tecrîdkerdişê Rayberê Şarê Kurdî Abdullah Ocalanî bêro wedaritene û vat, “Rojakewtena Mîyanêne û Tirkîya de krîzêko giran ê sîyasî, cimatkî esto. Rayîrê nê krîzî ra vejîyayîşî, wedaritişê tecrîdî yo. Ma zî naye ra grevê vêşanîye de yê. Waştişê hevalanê ke grevê vêşanîye de yê, teyna waştişê înan nîyê, waştişê ma yê. Seba ke ma nê waştişan ra wayîr bivejîyê dest bi grevê vêşanîye kerd û heta ke tecrîd nêro wedaritene ma do çalakîya xo dewam bikerê.”