Endamê Komeleya Huqûqnasanê Seba Azadîye (OHD) Osman Çelîkî tecrîdê vera Rayberê Şarê Kurdî Abdullah Ocalanî ercna.

Çelîkî pare kerd ke 22 serrî yo tecrîd bi hawayêkê sîstematîkî dewam keno û vat: ''Tecrîdê vera Birêz Ocalanî hînî pêro komelî ra vila bîyo û sey çeka teda û zorbazîye şuxilîyeno. Hukmatî qanûnî binpay kerdî û caardişê giranî Îmrali de kerdî. Seba aramî û haştîya welatî ganî na polîtîka cade bêra qedînayene.  Sebebo bingeyî yê meseleyanê Tirkîya tecrîd o. Meseleya verêne ya Tirkîya zî meseleya kurdan a. Eke hukmat wazeno na mesele çareser bikero ganî tecrîd wedaro.''

Çelîkî da zanayene ke pêro heqê meşrûyî yê Rayberê Şarê Kurdî Abdullah Ocalanî ameyî xespkerdene û vat: ''22 serran de Birêz Ocalanî rêna reyêk heqê xo yê telefonî xebitna. Polîtîkaya tecrîdî şaranê Tirkîya rê xizmet nêkena û zerar dana huqûq û komelî. Têkoşînê komel û huqûqî eşkeno tecrîd biqedîno.''

Çelîkî bale ante grevê vêşanîye yê tepişteyan ser û vat: ''Tepişteyî têna wazenê wa huqûq bêro caardene û tecrîd bêro wedaritine. Eke tecrîd dewam bikero û waştişê tepişteyan nêrê qebulkerdene netîceyê ci do giran bibê. Wa dewlete goş bida tepişteyan ser.''

Çelîkî peynîya qiseykerdişê xo de nîqaşê 'reformî' ercnayî û vat: ''Reform pê vurnayîşê hîşmendîya beno. Eke tecrîd nêqedîyo o reform reformêko raştikên nêbeno.''