Taxa Xelîkanî ya qezaya Çermûgî ya Amedî de weçînayîşê herêmî yê 31ê adar a 2019î de seba keyayîye pêrodayîşêk vejîyabi û keyeyê Selahattin Ozkahramanî dewe ra vejîyabi. Ozdemîro ke serrêke ra dima  badê pêkerdişî agêra texe pîya bi kênaya xo ya digane ame kiştene.

Goreyê zanayîşanê ke ameyî girewtene weçînayîş de  2 dezayî semedê keyayîye bîye namzed û her diyan zî dezayê xo Selahattîn Ozkahramanî (65)  ra raye waşte. Seba ke her di namzedî zî dezayê ci yê Ozkahramanî reya xo nêşuxulanye. E.Y. yo ke ke weçînayîş vînî kerd pîya bi di kesan hêrişê keyeyê lajê Ozkahramanî Ramazan Ozkahramanî kerd û o birîndar kerd. Badê ci pêrodayîşê mabênê her di keyeyan bi derg. Keyeyê Ozkahramanî rîyê pêrodayîşî ra bar ked şi Mersin. Dima ra keyeyan pêkerd û goreyê naye veyve, tazîye û semedê zîyaretkerdişê hêgayanê xo keyeyê Ozkahramanî eşkeno agêro taxa xo. Badê serrêke keyeyê Ozkahramanî şi taxe. 17ê adare de hela ke Ozkahraman pîya bi cinî û kênaya xo ya digane hêga ra agêrayêne keye dezayê ci  E.Y. û panc kesanê bînan bi çekan hêrişê înan kerd. Hêrişê de Ozkahraman û kênaya ci Surîye Ozkahraman a digane û wayîrê 3 doman cuya xo vînî kerde û cinîya ci Guzele Ozkahraman zî birîndar bîyî.