Mabênê DEM Partî û selahîyetdaranê AKPyî de meclîs de pêvînayîş ame kerdene. Kombîyayîş de prosesê demokratîkbîyayîşî, pêvînayîşê Îmraliyî, qerarê kongreya PKKyî û paketê înfazî ameyî destgirewtene.
Hemserekanê Pêroyî yê DEM Partî Tulaye Hatimogullari û Tuncer Bakirhanî bi selahîyetdaranê AKPyî meclîs de pêvînayîş kerd. Serekwekîlê Grûbe Gulîstane Kiliç Koçyîgît û Sezaî Temelî zî tewrê pêvînayîşî bîyî.
Pêvînayîşo ke Serekwekîlê AKPyî Efkan Ala, Vervatoxê AKPyî Omer Çelîk, Serekê Grûba AKPyî Abdullah Guler û Serekwekîla Grûbe Ozleme Zengîn tewrê ci bîyî hendê 2 saete û 25 deqayan kerd derg.
Badê pêvînayîşî DEM Partî eşkerayîya nuştekîyedaye. Goreyê eşkerayîye pêvînayîş de averşîyayîşê Tirkîya û herême çarçeweya hîra de ameyî destgirewtene. Averşîyayîşê badê Vengdayîşê Haştîye û Komelê Demokratîkî,pêvînayîşê heyetê DEM Partî yê bi Rayber Apoyî, qerarê ke PKKyî kongreya xo de girewtî ê zî ameyî destgirewtene. Ame vatene ke seba ke proses rayîr de şiro gemê ke hewce kenê û rolo ke meclîs do bîgîro xo ser ameyî qiseykerdene. Derheqê komîsyono ke do bêro ronayene de erjnayîşî ameyî kerdene. Pêvînayîş de bitaybetî paketê înfazî, serûberkerdişê semedê tepişteyanê nêweşan û seba ke nê serûberkerdişî verê roşanî bêrê kerdene waştişê komelî û DEM Partî bi hewayêkê zelalî ameyî îfadekerdene.
Eşkerayîye de ame vatene ke zîyaretê partîyanê sîyasîyan nika qedîyayî û zanayîş û erjnayîşo hîra do rojanê verê ma de bêro parekerdene.
