Qezaya Bongilanî ya Çewlîgî de ciwanê bi nameyê Mahfuz Taşî (18) seba ke nîşanê serkewtişî kerd hetê polîsan ra bi derbkerdişî ame destbendkerdene.

Mahfuz Taşî 9ê nîsane de gama ke pîya bi hîrê embazanê xo fotograf antene hetê polîsan ra ame vindarnaye.  Polîsan vat ''şima ma rê nîşan danê'' û hêrişê Taşî kerd. Bado ke poîsan darba mergî Taş kişt pê zorî eşt wesayît û berd Mudirîya Asayîşî ya Bongilanî. Taş şewe uca mend û sere sibayî ame veradayene.

Taşî vat gama ke polîsî ameyî înan ser ard ziwan ke nîşanê serkewtişî qedexe yo û vat 'şima qey nîşanê ulkucuyan nêkenê' Taşî îfade kerd ke o bîlasebeb ame destbendkerdene û wina qala şîdetê polîsan kerd: ''Polîsan çeke darte mi û bi derbkerdişî ez berda. Gama ke înan ez tehen daya ez ginaya erdî ro. Dima ra çar polîsan hêrişê mi kerd û mi eşt wesayît.

Mi polîsê ke çeke dart mi rê  vat 'şima qey danê mi ro' ey  vat 'mi to rê nêda la nika dano torê'  û da serê çimê mi ro. Mi înan rê vat 'çimê min  o çep amelîyatkerde yo.'  Naye ser o înan têdima da nê çimê mi ro. Nezarat de şîdetê înan dewam kerd. Heta ke nefesê mi birîya înan ez kişta.

Polîsan ez tehdît kerda ke ez gerreyê înan mekerî.  Polîsan vat, 'Eke ti xirab qala ma bikerî, ma do derheqê to de dosyaya terorî abikerê. Ma sîcîlê to kenê tarî. Ti nêeşkenê kar bivînî. Ma polîs ê tiway ma nêben.' Bado ke ez ameya veradayene ez şîya Nêweşxaneyê Dewlete yê Bongilanî la doktorî rapor mi nêda. Ez do gerreyê polîsan bikerê.''