Rêxistina HDPyî ya Çewlîgî tecrîdê Îmraliyî şermezar kerd. Eşkerayîyede pankarta ''Ma tecrîdî bişikinê û faşîzmî weşanê'' ameye akerdene û ame vatene ke bi şiknayîşê tecrîdî heme problemî eşkenê bêrê çareserkerdene.
Rêxistina Partîya Demokratîke ya Şaran (HDP) ya Çewlîgî bi eşkerayîyêke tecrîdê serê Rayberê Şarê Kurdî Abdullah Ocalanî şermezar kerd.
Çalakîya ke verê Kuleyê Saetî ame kerdene xeylêk kesî tewrê ci bîyî. Çalakîye de pankarta ke sero kirdkî ''Ma tecrîdî bişikinê û faşîzmî weşanê'' nuşte bi ameye akerdene.
Hemsererê HDPyî yê Çewlîgî Hasan Soysalî bale ante polîtîkaya tecrîdî ser û vat ewro na polîtîka sey îşkenceyî heme waranê komelkî yê welatî ra vila bîya. Soysalî vat: ''Îqtîdarê AKPyî sey pabesteyê tecrîdî herême de sîyasetê şerî rayra beno. Tecrîd têna Imrali de û vera kurdan nîno kerdene. Polîtkaya tecrîdî xeylêk wexto sey binpaykerdişê heqan her hetê Tirkîya ra vila bena. Coka şiknayîşê tecrîdî mifteyê çareserkerdişî yê problemanê Tirkîya yo. Têkoşînê vera tecrîdî paştîdayîşê têkoşînê demokrasî, azadîye û têkoşînê cinîyan o. Tecrîd astengo tewr pîl ê verê haştîya komelkîye yo. Îqtîdarê AKP-MHPyî semedê şer û pêkewtişan kerdo xo çeng. Bi sîyasetê şerî şaran û merdiman verdenê yewbînan. Birêz Ocalan semedê haştîye çîyo ke destê ci ra yeno keno. Ganî muxalefet semedê wedaritişê tecrîdî têbigêro. Reyna sere de CPT ganî dezgehê mîyanneteweyî yê ke derheqê babete de wayîrê qale berpirsîyarîya xo bîyarê ca.''
