Çewlîg û Xarpêt de semedê wedaritişê tecrîdê serê Rayberê Şarê Kurdî Abdullah Ocalanî çalakîyî ameyî kerdene. Çalakîyan de xoverdayîşê zîndanan ame selamkerdene.

Rêxistina HDPyî ya qezaya Kanîreşî ya Çewlîgî  bi eşkerayîya çapemenîye tecrîdê serê Ocalanî şermezar kerd û paştî daye xoverdayîşê zîndanan. Çalakîya ke verê banê partîye de ameye kerdene de pankartê ''Tecrîd sûcê merdimiye yo, tecrîdî wedarê'' ameye akerdene. Wekîlê HDPyî yê Çewlîgî Erdal Aydemîrî ke çalakîye de qisey kerd bale ante grevê vêşanîye yê tepişteyan ser û  veng da ke wa helêke cuwa ver waştişê tepişteyan bêrê caardene. Aydemîrî ard ziwan ke waştişê tepişteyan ca de yê û meşrû yê û vat gereka tecrîd cade bêro wedaritene.

Bi eynî weştişî çalakîyêke zî hetê rêxistina Depî ya Xarpêtî ra ameye kerdene. Verê banê partîye de eşkerayîya çapemenîye ameye dayene û bale ameye antene grevê vêşanîye ser. Çalakîye de Hemserekê HDPyî yê Depî Veysî Saritagî vist vîr ke tecrîd serê heme şarî de tesîr keno û waşt ke pêvînayîşê çareserî wa newe ra bêrê destpêkerdene û tecrîd bêro wedaritene. Saritagî veng da ke wa her kes semedê tepişteyan hîsgêr têbigero ke hema ke rewşe zaf giran nêbîya wa tecrîd wedarîyo û grevê vêşanîye bêro qedînayene.