Fermandara Qerargehê Merkezî yê YJA-Starî Zozane Çewlik cewab da persanê ANFyî û şerê Herêmanê Pawitişî yê Medya ercna.

Zozane Çewlik verî çalakîya Zîlane ya fedayîye ercnaye û serrgêra şehadetê ci de Zîlane yad kerde. Zozane Çewlik vat: ''Hêzê afernayoxî yê tradîsyonê xoverdayîşê ma şehîdê ma yê. Ê abîdeyê xoverdayîşî yê. Ez bi wesîleya menga fedayîtîye hezîrane şexsê Zîlane, Sema û Gulane de pêro şehîdanê têkoşînî û şehîdanê Zap, Metîna û Avaşînî bi rêzdarî yad kena. Çalakîya embaze Zîlane 1996 de vera Komployê 6ê Gulane yê serê Rayberîye, vera hêrişan û vera xeta tasfîye ameye kerdene. Çalakîya aye bîye îfadeyê fermandarîya serfîrazîye, durustî, milîtanîya qerardare û perwerîye. Aye pêro detayê mexlubîyetî wedaritî û bîye armanc, çalakîye. Çalakîya embaze Zîlane bi giranî tesîrê têgêrayîşê ma û Rayberîye kerde. Çalakîya aye ma rê bîye perspektîf. Têkilîya Rayberîye û Zîlane têkilîyêka azade bîye. Embaze Zîlane tehlukeyê vera Rayberîye rew dî û bê talîmat cade çalakîya xo kerde.''

Zozane Çewlik vist vîrî ke Sema Yuce Newroza 1998î de bedenê xo da adirî ver û bîya teqîbkerdoxa Zîlane. Zozane Çewlik vat: ''Embaze Sema zî durist, sade, çêr, hişmend û cigêrayîşê mana est bîyî. Çalakîya aye averşîyayîşê îdeolojîya azadîya cinîyan rê zaf tesîr kerd. Çalakîya aye reyde xeta azadîya cinîyan aver şîye û resaye nê rojan. Reyna şehîdanê hezîrane ra Gulane seba ke xeta nê têkoşînî bipawa israr kerd. A yew fedayî bîye. Karakterê embaze Gulane perwerî, israr û înadî ardî têkoşînê ma.

Ewro başûrê welatê ma de xeta Zîlane de şerêk yeno kerdene. Ma verî zî bedelê pîlî dayî la bedelê nê şero ke 17ê nîsane de pê hêrişanê dişmenî dest pêkerd, ê verênan ra pîlêr ê. Şerê 17ê Nîsane 25ê gulane de derbazê safhayêka newîye bi û dişmenî dest eşt çeka kîmyewîye. No şer têna koyan de sînordar nîyo. No şer vera şarê kurdî yo. Nê hêrişî hêrişê îdeolojîkî yê. Wa her kes hol bizano ke manaya hêrişê DAÎŞî yê vera Kobanê çita ya manaya nê êrişan zî a ya.

Gerîlayî bêmabên şerêkê stratejîkî kenê, xo ver danê. Erdogan, Bahçelî, Akar û Soylu seba ke îqtîdar de bimanê nê şerî rayra benê. Cara înan ard ziwan ke seba ke hêriş bikerê ameyê Kurojahro. Dima ke Akar û cergê ci Kurdîstanî (HewlêR) şer derbazê safhayêka newîye bi û hêrişê kîmyewîyî dest pêkerd. Gerîlayî pê tecrubeyanê 2021î şerî kenê. Embazê ma tunelan ra vejîyenê, şinê dişmenî ser, dest nanê malzemeyanê înan ser.

Merkezê nê hêrişan wa herêma Botanî estb a. Embazanê ma nika Botan de Hemleyê Şehîd Şervan Êrkendî û Şehîde Diljine Marya îlan kerdî. Cûdî, Besta û Kato de zî hêzanê YJA-Starî çalakîyê bitesîrî kerdî. Performansê embazê ma cara zaf berz o. Hêzê ma yê Başûrî do serfîrazîye tacîdar bikerê.

Hêzanê YJA-Starî performansê xo 2022 de zaf zêdînayî û resnayî lewe. Serkêşîya şerwananê YJA-Starî rê çew heyran maneno. Embazê ma vanê 'Tîya Kurdîstan o, tira vejîyayîş çin o' û şinê serê dişmenî. Embazê ma yê YJA-Starî xeta Zîlane de şer kenê. Embazê ma seba ke welatê xo bipawê pêro fedakarîyan kenê.

Nê şerê vera faşîzmî de ganî têkoşînêko plankerde, rêxistinkerde û yewîye bêro kerdene. Eke hêzê şorişgêr, çepgîr, azadgîr û demokratîkî yew binê faşîsmî rê derbe yena dayene ro. Eke têkoşîn yew ca de bimano xoverdayîş sînordar beno. Ma hînî serfîrazîye waenê. Ma nêwazenê zor bidê faşîzmî; ma wazenê faşîzmî bin bikerê.

Nika vera Mexmûr û Şingalî zî hêrişî est ê. Vera Rojawanî planêko newe yê îşxalî yeno amadekerdene. Dewleta tirke ya îşxalkere wazena kilîdê Herêmanê Pawitişî yê Medya abikera û uca ra derbazê pêro Kurdîstanî biba. Têna PKKgîrî nê pêro kurdî tehlukeyî de têrî yê. Ganî hêzê Rojawanî zî faşîzmî bikerê binê erdî, dişmenî bin bikerê. No şerêko stratejîk û tarîxî yo. Hêzê Rojawanî zî ganî nê şerî de mesuldarî û erkanê xo bîyarê ca.

Netîceyê nê şerî têna welatê ma rê tesîr  nêkerê. Fedayîyanê azadîye mesajê serfîrazîye cara dayo. Tunelanê şerî yê Kurdîstanî de kapîtalîzm ame binvistene. Wa her kes bizano ke hînî vate nêmendo ke do vajîyo. Nê têkoşînî de têkoşîn, cu û nasnameyo Zîlanwarî do serfîrazîye bîyarê. Serfîrazîye û azadîye nê karakterî de nimite yê.''