Xîretê seba îtîfaqê neteweyî yê kurdan hewteyê vîyarteyî de resayî astêka newîye. Partîyanê kurdan ê ke weçînayîşê 31ê adare de mîyanê îtîfaqî de bîyî, 24ê teşrîna verêne ya 2020î de bi eşkerayîyêke îtîfaqê xo kerd mende.

Beşdaranê îtîfaqî ra Serekê Pêroyî yê Partîya Komunîste ya Kurdîstanî (KKP) Sînan Çîftyurekî derheqê safhaya îtîfaqî û armancanê înan de ANFyî rê qisey kerd.

Çîftyurekî ard ziwan ke seba mendebîyayîşê nê îtîfaqî ê tim xebitîyayî û vat:''Dima ke şar sey kerdox ame mojnayene îtîfaq zî vurîya îtîfaqê stratejîkî. Ma çarçewa îtîfaqê xo de komîsyonê têkilîya bi şarî awan kerd û ma roşnvîr, rîsipîyê kurdî zîyaret kerdî. Ma fikrê înan girewtî. Bi nê hawayî ma îtîfaqê xo kerd hîra. Komîsyonê ma yê diyînî zî metodanê yewîya neteweyî yê Afrîka û Asya ser o cigêrayîşî kerdî. Çarçewa nê cigêrayîşan de zî ma modelê xo yê yewîya neteweyîye bi hawayê 'kongre' pare kerd. 

Coka ganî ma Amed, Îstanbul û Ewropa de komxebatî bikerdêne. Êlule û teşrîna verêne de ma konferansêko pîl bikerêne û îtîfaqê xo yo mende îlan bikerdêne. La  vîrusê Korona planê ma asteng kerdî. Coka ma kombîyayîşê xo yê peyênî de da zanayene ke ganî ma îtîfaqê xo mende bikerê. Peynîya kombîyayîşî de zî bi beşdarîya Hemserekê HDPyî Sancarî ma eşkerayîya xo daye çapemenîye.''

Çîftyurekî îfade kerd ke dima ke îtîfaqo neteweyî ame îlankerdene babeta girîge proseso nikayên û dima yo. Çîftyurekî vat: ''Ganî ma bi dîsîplînî xebata xo dewam bikerê. Ma do komîsyonanê xo reyde kombîyayîşan bikerê û karê xo dewam bikerê. Îtîfaqê ma girîng o. Çunke îtîfaqê cumhurî  bi polîtîkayanê xo yê gemarinan ê vera Vakurê Kurdîstanî wazeno armancê xo yê turanîzmî  bîyaro ca. Seba ke ê kurdan sey astengîye vînenê tim hêrişê înan kenê. Îtîfaqê cumhurî kurdan Vakurê Kurdîstanî de û Tirkîya de sey hêzê pîlî yê demokrasî vîneno naye ra zî hêrişê kurdan keno. No îtîfaq seba hêrişanê xo yê bînan zî kurdan sey bahane mojneno.''

Çîftyurekî eşkera kerd ke sey îtîfaqê neteweyî yê kurdan barê înan giran o û vat: ''Ganî merdimî pêkerdişê Tirkîya û Rûsya bîyarê xo vîrî; tirkî bedelê Îdlîbî de Kobanê, Til Rifat û Minbiz wazenê. Îran zî Rojawanê Kurdîstanî ser o plananê neweyan keno. Ganî sey îtîfaqê Kurdîstanîyî ma nînan pêroyînan bivînê û goreyê naye sîyaset bikerê. Naye ra pey ma goreyê menfaatanê partî nê goreyê menfaatanê şarê xo û Kurdîstanî sîyaset bikerê.''