Amed de bi şîarê “Cinîyî bi waştişê haştîya komelkîye û çareserîya demokratîke rayra şinê” rayraşîyayîşêk ame kerdene. Rayraşîyayîşo ke hetê Têgêrayîşê Cinîyan ê Azadan (TJA) ra ame kerdene Hemserekê Pêroyî yê DBPyî Çîgdeme Kiliçgun Uçar û Hemsereka Pêroyî ya DEM Partî Tulaye Hatimogullari zî tewrê ci bîyî.

Xeylê bajaranê Kurdîstan û Tirkîya ra cinîyê ke Parka Yaşamî ya Şemse Allak de ameyî têhet, ver bi Ulu Camîya Sûrê Amedî dest pê rayraşîyayîşî kerd. Warê çalakîye de pankartê “Sedsala jine wê bibe şoreşa zimanê kurdî” û “Jin, jiyan, azadî” ame akerdene û sloganê sey “Jin, jiyan, azadî, azad bike Rêbertî”, “Bê Serok jiyan nabe” û Bijî Serok Apo”, “Bijî aşitîya civakî“Jin, civakê azad dike”, “Ji bo wekheviyê em li vir in” û “Berxwedan jiyan e” û tîlîlîyî bîyî berz. Çalakîye de fotografê cinîyan ke ameyî qetilkerdene ameyî kiriştene; bi laçikan û şapkayanê sipîyan sembolê haştîye ameyî ramojnayene.

Badê rayraşîyayîşî eşkerayîya çapemenîye ameye dayene. Eşkerayîye de bale ameye antene vengdayîşê Rayber Apoyî yê 27ê sibate ser û ame vatene ke nê vengdayîşî şaranê Rojhelatê Mîyanênî û bitaybetî zî cinîyan rê modelê cuye yo newe teqdîm kerd. Cinîyan vat ê do wayîrê vengdayîşî bivejê û dormeyê ci de bêrê têhet. Eşkerayîye de ame vatene ke haştîye eke ziwanê dayîke de û bi kulturê komelkî bêro înşakerdene bimana yo ame îfadekerdene ke komelo demokratik komelê cinîyan o.

Eşkerayîye de ame waştene wa haştşya fîzîkîye ya Rayber Apoyî bêro caardene, komîsyono ke do meclîs de bêro ronayene semedê çareserkerdişê meseleya kurdan aktîf xebate rayra bêro, seba ke estbîyayîş, nasname, kultur û ziwanê kurdan azad biciwîyê wa qanûnê bingeyî de bîgîrê binê asayîşî, ziwanê haştîye bêro şuxulnayene, wa meclîs semedê vergirewtişê şîdetê serê cinîyan serûberkerdişê qanûnî bêrê kerdene û wa qeyûmî peyser bêrê antene.