Wisarê 2011î de embazan vat ke seba yew karî ganî ez embaz Delîl Karakoçanî (Hasan Çakmak) bivîna. Ma şîyî kişta Avaşînî. Binê versîya çinarêkî de kişta ma de Avaşîn herikîyayêne. War de çew çinbi. Embazo ke ez arda vat embaz Delîl cayê xo de nêvindeno û o do ey bivîno bîyaro. Dima destê ci de vaştûrî embaz Delîl ase. Hem rayîrî ra şîyêne hem zî pê vaştûrî darê meyweyan kontrol kerdêne. Wexto ke o resa cayê mi ma dest da yewbînan, ey awe daye mi û şi awa Avaşînî de dest û rîyê xo şitî. Dima demlîgê xo de çay dem kerd û ma pîya arayî kerde.

Delîl Karakoçan qezaya Depe ya Xarpêtî de dadîya xo ra bîyo. Keyeyê ci pê heywankarîye debara xo kerdêne. o ciwanîya xo de şîyo metropolanê Tirkîya û serranê 70an ra dima netîceya hêrişanê faşîstan de keyeyê xo reyde şîyo Ewropa. 1992 de zî o Ewropa ra tewrê gerîlayan bîyo. Ey bi xo şahîdîya Mam Reşo û keyeyê ci, operasyonanê hemparan ê PDK û Tirkîya kerde. Serra 1993î ra heta 2018î hema hema pêro emrê ci Zagrosan de vîyart. Rixmê nêweşîyanê ci çew nêeşka ey Zagrosan ra dûrî bivisno.

Ey bi seyan embazê xo yê çêrî Zagrosan de şehîd dayî. Mi ey ra pers kerd ke çira ameyo gerîlayan het. Ey vat: ''Ez felsefe nêzanena. Beno ke wijdanê mi ez arda, beno ke ez gêrayêne çîyêk. Çalakîya Mazlûm Doganî mi rê zaf tesîr kerdbi.''

O pêro cayê Zagrosan ra gêrabi, tede têkoşîn kerdbi. Her patîka, dare de, kişta awe ra hîkayeya ey neqişnaye bîye. Ey 25 serran Zagrosan de têkoşîn kerd, çend reyî mergî ra agêra. Ey tim kede dayêne xoza, leyî ronayêne, gilê wişkî pakerdêne, awe dayêne daran. Ey bi nê hawayî deynê xo dayêne xoza.

Delîl Karakoçan 14ê temmuza 2018î de şan pa di embazanê xo bombardumanê artêşa îşxalkere de şehîd bi. Tîzbehê ci ra ber çîyêkê ci çinbi. Ey alaya Mazlûm Doganî girewtbî xo dest, berz kerdbi û dima embazanê xo rê na ala verdabi. 

O raywanê raştîye kewtbi rayîrê koyanê Kurdîstanî û resabi Zagrosan. O pê kewîtîya Avaşînî ya çimanê xo çinarêko qedîm bi ke kokê ci binê Zagrosan de bi.