Qezaya Elbîstanî ya Mereşî de zîyareta Îçmelerî, hetê Elewîyanê herême ra sey pîroz yena qebûlkerdene. Çinarêra pîle ya ke zîyareta Îçmelerî de ya zî wayîrê pîrozîyêk a. Şarê herême vanê vêşnayîşê çinarêra pîle hemverê Elewîyan de hêrişêk o. hewna nêno zanayene ke çinarêre hetê kamî ra amîya vêşnayene.

 Keyayê dewa Çîftlîkkale Hasan Kûlî qewimîyayîşî ser o nê vatî: “Embazê ke payîze yenê zîyarete ferq kenê ke dare ameya vêşnayene. Ma rîyê şertanê giranan ra zimistanî nêeşkenê bêrê nê doran. Gama ma bi meseleyî hesîyayî ameyî zîyarete, bi rastî zî dare amîbî vêşnayene. Bewlî bi ke bi zanayîşî ameya vêşnayene, la ma nêzanê hetê kamî ra ameya vêşnayene. Ma sey şarê herême fermandarîya cendirmeyan ra waşt ke tedbîr bigêrê. Înan zî tabelaya ke lazime bîye dorê zîyarete de ronaye. Nika ma do keyeyanê xo ra zîyarete hîna nizd ra bişopnê.”

 Dewijêk zî vat hêriş tesadufî nêyo, amaco esil bêtehemulîya hemverê kulturê Elewîyan o. Dewijî vat, “Amac vêşnayîşê dare nêyo. Sebebo bingeyên ê vêşnayîşî kulturê Elewîyan o. Ma hewna nêzanê kami kerdo. Wa weşî bê komele û cemxaneyanê ma yê ke tîya yê xebere resnaye Mudurîya Pêroyîye ya Daristanî, leşker ame û meseleyî dir eleqedar bi. Seba pawitişê dare çi keweno milê şarî ser şar keno.”