Gerîlayê HPGyî Emre Atabey (Îbrahîm Sari) serra 1991î de qezaya Ebexî ya Wanî de dadîya xo ra bi. Serra 2009î de wexto ke dewleta tirke ya faşîste operasyonê sîyasîyî dayî destpêkerdene, ey zî verê xo da koyanê azadan ê Kurdîstanî. Îbrahîm 6 serranê gerîlatîye de bi şahîdê zaf serebûtan. Sari 24ê êlula 2015î de tewrê Operasyonê Şorişgêrî yê Elkê bi ke 24 saetî dewam kerd. Artêşa tirke ya îşxalkere nê operasyonî de derbê giranî werdî. Artêşa tirke ya îşxalkere nê şerî de ÎHA, SÎHA û teyarayê şerî xebitnayî. Mabênê artêşa tirke ya îşxalkere û gerîlayan de 3 rojan şer qewimîya. Îbrahim Sariyî 8 embazanê xo reyde bi çêrî şer kerd û tewrê bêmergan bîyî.
Embazanê ci qala Îrahîm Sariyî wina kerde: "Çîyo ke Îbrahîm gêrayêne ci mîyanê PKKyî de dî. Kewt rayîrê rastîye yo ke gêrayêne ci. Mîyanê gerîlayan de her roje xo aver berd, welatê xo keşîf kerd. Îbrahîm heskerdoxê welatî, embazanê xo û Rayberîye bi. Îbrahîmî felsefeya Apoyî nas kerdêne, enerjî û coşê xo şorişî de yew kerdêne û tim xo ver dayêne. Îbrahîmî dengbêjîye kerdêne. Dima ke tewrê gerîlayan bi cinitişê sazî zî musa. Bi kilam û deyîranê xo embazê xo mest kerdêne. Şoriş û hûner kerdêne yew. Îbrahîm Sari wextêk Botan de gerîlatîye kerde û dima derbazê Herêmanê Pawitişî yê Medya kerd. Îbrahîm yeno manaya çalakîye û têkoşînî. Botan de ke o heskerdoxê ci bi hema zî rêçê leşkeranê îşxalkeran estbî, coka nêwaşt şoro cayêkê bînî. Îbrahîmî têna waştêne ke koyan û deştanê şarê xo de vera dişmenan şer biko. Eke cayêk de çalakîye estba ganî Îbrahîm tewrê ci bibîyêne."
Îbrahîm Sari û 8 embazê ci yê HPGyîjî pîya têkoşînêkê çêrî ra dima şehîd bîyî. Şar zî bi girseyanê pîlan tewrê merasîmê cenazeyanê înan bi.