Ewro rayberîya Kongreya Komelê Demokratîkî (DTK), Têgêrayîşê Cinîyan ê Azadan (TJA), DBP û HDPyî de seba yewîya neteweyîye çalakîya rayraşîyayîşî  do biameyêne kerdene. Rayraşîyayîşî ra verî polîsan Parka Ataturkî girewte binê ablûqa. Rixmê ablûqaya polîsan zî şar dormeyê parke de ame pêser. Mabênê şar û polîsan de nîqaşî virazîyayî. Dima şar dest pê rayraşîyayîşî kerd. Polîsan pê awa tazyîkîne û gazê îsotî hêrişê şarî kerd.

Şarî pê sloganê 'Biciwîyo xoverdayîşê zîndanan' û 'Tedayî pê ma nêeşkenê' cewabê hêrişî da û ver bi Kuçeyê Dîyarbekirî şi. Polîsan uca reyna hêrişê girseyî kerd.

Vera hêrişê polîsan sîyasetmedar û hemwelatîyan hîrê qolan ra kewtî ermeyê yewbînan û ver bi banê HDPyî rayra şîyî. Rayraşîyayîş de sloganê xoverdayîş û waştişê yewbîyayîşê kurdan berz bîyî.  Rixmê hêrişê polîsan şar bi qerardarîye rayraşîyayîşê xo domna. Kuçeyê Êlihî pê slogananê ''Wa bimiro xayînîye'' û ''Wa biciwîyo xoverdayîşê Îmrali û zîndanan'' zimayî.

Hêrişê polîsan de Hemserekê Pêroyî yê KCDyî Bedran Ozturk, Hemserekê Pêroyî ya DBPyî Salîha Aydenîz û Bayindir Keskîn  û Wekîlê  HDPyî Ayşe Acar Başaran û Dersime Dag zî tede xeylêk kesî hetê polîsan ra ameyî derbkerdene. Reyna endamê Meclîsê Mayanê Haştîye zî tede nizdê 20 kesan ameyî destbendkerdene. Rixmê hêrişî rayraşîyayîş heta verê banê partîye ame domnayene. Tîya binê ablûqaya polîsan de eşkerayîye ameye dayene. Bedran Ozturkî xoverdayîşê şarê Êlihî yê semedê yewîya neteweyîye selam kerd û vat seba ke yewbîyayîşê kurdan ra tersenê, ci rê tehemul nêkene wina hêriş kenê.