Çeteyanê DAÎŞî 3ê tebaxa 2014î vera Şingalî hêrişê qirkerdişî kerd. Şingalijî nê hêrişî sey Fermanê 74. pênas kenê. 12 hezar peşmergeyê PDKyî û 7 hezar hêzê pawitişî yê Iraqî yê ke ke pawitişê Şingalî ra berpirsîyar ê gama ke hêrişî dest pê kerd xo dima nêewnîyayî remayî.  Tam wexto winayênî de 12 gerîlayan ra grûbêke seba ke verê qirkerdişî bigêro verê xo da Şingalî. Bado ke gerîlayan Şingal çeteyan ra kerd pak, 1ê nîsana 2018î de Şingal û koyanê ci de komelê êzidîyan ra xatir waşt û peyser agêrayî.

Serrgêra agêrayîşê gerîlayan de Endama TAJÊ Jaklîne Hisên derheqê babete ANFyî rê qisey kerd. Hisêne vat: ''Xeyrê gerîlayan êzdayîye û êzidîyê Şinganî mendî. Gerîlayan hem Şingan çeteyanê DAÎŞî ra xelisna hem zî badê xelisnayîşî şaro ke bîyo vila ard pêser û newe ra cuya na ro. Tîya hetê sîyasî, leşkerî û komelkî ra îradeyêk ard ra êzidîyî ardî ca. Gerîlayan mûsna ke ma senî eşkenê xo bipawê. Ewro ma xeyrê înan est ê. Gerîlayan bado ke ma xelisnayî agêrayî koyanê azadan. Gerîlayî zaf kewtî ma vîr. Înanê reyde ciwîyayîş semedê ma anor bi.''

Jakline Hisên qiseykerdişê xo wina domna: ''Kesê ke ma sey dostanê xo zanayêne xewtê fermanî de rîyê xo yo raşt mojn ama. Her kesî hesabê menfaatê xo kerd. Ma êzidîyî tarîxî ra tim bêwahar ê. Fermano peyên zî wina bi. La narey çîyêko bîn bi. Hêzo ke semedê ma ganê xo dano ma nas kerd. Gerîlayan semedê ma ganê xo feda kerd û ma pawitî. Vera nê fedakarîye çîyêk zî nêwaşt. Ma do çirey înan xo vîr a mekerê. Gerîlayan zerrîya êzidîyan de cayê xo girewt. Ê hinî yew perçeyê ma yê.

Fikrê Rayber Apoyî komelê êzidîyan bedilna û eslê xo de ardî têhet. Ma cinîyî verê fermanî bêqiymet bî la bado ke ma şerwanê Serek Apoyî nas kerdî ma xo perwerde kerd û semedê ma her çî bedilîya. Ewro ma cinîyî dewanê xo îdare kenê, qerarê qederê Şingalî bewlî kenê de ma wayîrê qale. Cinîyî bîyî wayîrê vate û cuye. Cinîya xopawitiş mûsayî. Tewr zaf zî pawitişê bawerîya xo mûsayî. Xora êzdayîye û felsefeya Serek Apoyî yewbînan rê nêzdî yê.''

Hisêne pêkerdişê 9ê teşrîna verêne yê Bexdad-Anqara-Hewlêrî sey dewamê fermanî name kerd û vat: ''Her hetî ra zext kenê ke îradeyê êzidîyan bişiknê. Ma zanê ke tim gerîlayî ma pawenê. Paşta ma înan ra pêt a. Xora ma nêweştêne ke gerîlayî şirê. Bê hêzanê ma û gerîlayan çew ma nêpaweno. Ma naye zî zanê.  Barzanîyan çim verdayo herra Şingalî.  Wa bizanê ke ê se kenê wa bikerî ma do çirey herra xo cavmeverdê.''

Jakline Hisên vat: ''Badê fermanî Şingal û Rojawan yewbînan rê bineyna bîyî nêzdî. Înan zaf paştî da ma. Wextê fermanî de heme berî ma rê ameyî qefilnayene la berê Rojawanî akerdebi. Rojawanî her hetî ra paştî daye ma. Nika beranê Rojawanî qefilnenê.  Hetê bînî ra ma û erebî zî dajîna bîyî nêzdî ma û dewê ereban pîya herra xo pawenê. Nika mabênê ma û nê dewam zî pê têlan genê.  Wazenê ke her hetî êzidîyan têna verdî û hukmatê Başûrî rê mecbur bikerê. La man ê qebul nêkenê. Çew nêeşkeno îradeyê ma bişikno.''