Komîsyonê Domanan ê Beşê ÎDH’yî yê Amedî derheqê domananê ke teba dayîkanê xo ra hepisxaneyan de yê, eşkerayîyêka nuştekîye weşanaye.

AKP qerarê mahkeme zî nas nêkeno

Eşkereyîye de ame vatene ke heta nika înan tespît kerdo ke 743 domanî teba dayîkanê xo ra hepisxaneyan de yê û eşkerayîye wina ame vatene: “Cinîya girewte ya bi nameyê Şukran Îrge teba 2 domananê xo ra Hepisxaneyê Tîpê E’yî yê Amedî de yê. Îrge muracatê Mahkemeya Qanûnê Bingeyênî  kerdibi û  muracatê ci amebi qebûlkerdene û qerar da bi ke wareyê qanûnî de serrastkerdiş bêro kerdene. La rixmê nê qerarî zî bi seyan domanî teba dayîkanê xo ra hepisxaneyan de yê. Dergûşa bi nameyê Avşîn Ûsanmaze 6 mengî yê ke teba maya xo ra hepisxane de ya û Avşîne de nêweşîya Hemanîjomî esta. Seba tedawîkerdişê dergûşe û seba têkilîya aye bi maye qut nêba, bi nameyê dayîke muracat ameyo kerdene la taloqkerdişê girewtişê dayîka aye ameyo redkerdene. No qerarê redkerdişî vera peyamanê mîyanneteweyî yo . Nêno qebûlkerdene ke domanêka nêweşe hepisxane de yena girewtene. Ma vengdayîş bi selahîyetdaran kenê, seba ke domananî bieşkê şertanê hîna başan de cuya xo dewam bikerê, wa wareyê qanûnî de gamî bêrê eştene.”