Însîyatîfê Keyayanê Pirsûsî bi eşkerayîyêk waşt ke Maya Evrîm Denîz Erolî yo ke mîyanê kişteyanê Qirkerdişê Pirsûsî de bi, Besra Erole ya ke ameya tepiştene wa serbest bêro veradayene.
33 kesê ke cayanê cîyayan ê Tirkîya ra pêresaybî waştêne qezaya Pirsûsî yê Riha ra domananê Kobanê rê pêkayokan bişirawê la netîceyê hêrişê bombayinî yê DAÎŞ’î de cuya xo vîndî kerdebî. Evrîm Denîz Erolo ke ê kişteyan ra yew bi maya ci Besra Erole bi sebebê qiseykerdişêkê xo yê cenazaya lajê xo ameyebî tepiştene.
Însîyatîfê Keyeyanê Pirsûsî Amed de kombîyayîşê çapemenî organîze kerd. Kombîyayîşêko banê Komela Heqan a Merdiman (ÎHD) de ame viraştene parlementera HDP’yî Remzîye Tosûne û xeylî temsîlkarê dezgehanê cimatanê sivîlan tewrê ci bîyî.
‘Peynîya To Ameye Besra Xanim‘
Eşkerayîya verê mesajê Besra Erole ame wendene. Erole mesajê xo de nê vatî: ‘‘Wextê muhakemekerdişê mi de mi ra persayî qey mi qiseykerdişê cenazeya lajê xo de vato şehîd. Qey ez tewrê Newroza Amedî bîya. Roja ke ez ameya tepiştene polîsan ke mi destbend kerdbi berê mehkema de mi tehdît kerd û mi ra va,‘ Peynîya to ameye Besra xanim‘. Lajê mi sey endamê terorî vînenê la lajê mi hetê rêxistina terorî ra ame kiştene. Na yewe komplo ya. Ganî ma vengê xo hîna berz bikerê.‘‘
Dayîkan nê Qetilkakran Bitepişê
Dima ra metnê çapemenî ame wendene û dîya zaneyene ke cezaya ke dîyaya Besra Erola 62 serrî, na ceza dîyaya mucadeleyê edaletî yê keyeyanê Pirsûsî û ame vateneke dayîkan nê qetilkaran muhakeme bikerê. Eşkerayîye de ame waştene ke Besra Erole ke bilasebeb ameya cezakerdene wa cede serbest bêro veradayene.
