9ê teşrîna verêne ya 2019î de dewleta tirke ya îşxalkere û cerganê ci hêrişê Serêkanîyê û Girê Sipî kerd. Nê hêrişan de bi seyan sivîlî ameyî qetilkerdene û bi hezaran hemwelatîyî neçare mendî ke koç bikerê. Roja îşxalî heman wextî de serrgêra Komployê Mîyanneteweyî yê vera Rayberê Şarê Kurdî Abdullah Ocalanî zî bîye.

Hemsereka Temsîlkarîya Rojawanî ya Başûrê Kurdîstanî Nûrşene Hesen serrgêra îşxalê Serêkanîyê û Girê Sipî de ANFyî reyde qisey kerd.

Qiseykerdişê Nûrşene ra beşêk wina yo:

''Îşxalê Serêkanîyê û Girê Sipî hetê Amerîka ra ame tesdîqkerdene. Îşxalî ra serrêke derbaz bîye û rîyo raştikên ê dewleta tirke eşkera bi. Dewleta tirke Serêkanîyê de teror û wehşet kena ke wa roniştoxî şorê û demografîya herême bivurîya. 

Roja îşxalî tesadûfî nîya. A roje destpêkerdişê Komployê 9ê Teşrîna Verêne bîye. Rojawan de sîstemê 'cuya têdûşte' yeno caardene ke bingeyê xo felsefeya Rayber Apoyî ra girewto. Dewleta tirke seba ke kurdan qir bikera plan û projeyêko winasên kerd. Her kes hînî raştîya dewleta tirke û yê cerganê ci zaneno. Raporanê Neteweyan ê Yewbîyayeyan de zî eşkera bi ke dewleta tirke sere de Efrîn, Girê Sipî û Serêkanîyê de pêro Rojawan de binpaykerdişî kerdî. Tirkîya xîret kena ke nê plananê xo Lîbya, Azerbeycan, Sûrîye û Iraq de zî bîyara ca.

Ez venga teref û hêzanê sîyasîyan ê kurdan dana ke vera plananê dewleta tirke seba azadîya Abdullah Ocalanî paştî bidê Hemleya 'Wext Wextê Azadîye.' Ganî her kes bizano ke bê azadîya Rayber Apoyî haştî û azadîye nênê caardene.''