Merkezê Îrtîbatî û Çapemenîye yê HPGyî derheqê  hêrişanê artêşa tirke de eşkerayîya nuştekîye daye.

HPGyî vat: ''Têgêrayîşê ma seba ke prosesê erdlerzî de derbê şaran bêrê piştene, çalakîyê hêzanê xo yê pawitişê meşrûrî vindarnayî. Rixmê nê qerarî artêşa tirke ya îşxalkere bi bombayanê qedexeyan, tanq û çekanê giranan hêrişê mewzîyanê têkoşînî  kerd. Hêrişê artêşa tirke yê  vera mewzîyanê têkoşînî yê ke nêzdîya dewa Sîda de yê, 9ê sibate de hemarayê Mazlûm şehîd bi. Nasnameyê embazê ma Mazlûmî do peyra bêro eşkerakerdene.

10ê sibatê îşxalkeran hêrişê mewzîyanê têkoşînî yê herêma Çemçoyî kerd, hêzanê ma xo pawit  û netîceya nê de îşxalkerêk ame cezakerdene û helîkopterêkê hêrişî ame derbkerdene. Eynî roje Warê Xoverdayîşî yê Girê Cûdîyî pê teyarayanê şerî 3 reyî dîya bombayan ver. 9ê sibate de mewzîyê têkoşînî yê dewa Sîda yê Şêladizê yê Amedîyê bi bombayanê qedexeyan dîyayî bombayan ver.