Şahîdê Qirkerdişê Dêrsimî Dengbej Silo Qizî vefat kerd

Dengbej Silo Qizo ke Qirkerdişê Dêrsimî de heme merdimê xo vînî kerdî û 104 serrî yo Dêrsim de ciwîyayêne ewro  vefat kerd.

Goreyê xebera Ajansê Xeberan ê Pîrî (PÎRHA) Silo Qizo ke Qirkerdişê Dêrsimî de heme merdimê xo vînî kerdî û seba ke kemane cineno bi amencê ‘no do keyfê ma bîyaro‘ nêame kiştene, ewro Dêrsim de vefat kerd.

Silo Qizo ke dewa Mîllî ya Dêrsimî de têna ciwîyayêne rituelê bawerîya elewîyan û dejanê Qirkerdişê Dêrsimî yê 1938î ra deyîrî viraştêne û heme herême ra vengê nînan vila kerdêne. Silo Qiz siba do dewa Mîllî de bêro definkerdene.

Silo Qiz Kam o?

Silo Qiz westayêko namdar ê kemane û vateyî yo û seserrî yo  Dêrsim de ciwîyeno. Hema ke 5 serre bi pîyê xo ra cinayîşê kemane museno. Demêk ra dima dest bi vatişî keno. Dej û keyfê şarî û  hîkayeyayê qewimîyayîşan bi muzîk dano eşnawitene. Semedê cinîyan ê ke tira bi eşqê platonîkî hes kerdêne deyîran vano. Muzîkê xo veyve û tezîyeyanê dewan de îcra keno. Siklo Qizo ke şahîdo ganî yê Qirkerdişê Dêrsimî yo bi deyîran xoverdayîş û qirkerdiş ardêne ziwan.