Vera pêkerdişê hukmatê PDK û Iraqî yê derheqê Şingalî de nêrazîbîyayîşî dewam kenê. Pêkerdişê tasfîyekerdişê Şingalî yo ke bi waştişê Tirkîya ame kerdene rê Şingalijan hêrsê xo ard ziwan.

Gerîlayê HPGyê ke seba Şingalî şehîd bîyî ma înan xo vîrî ra nêkenê

Neam Bedel: Heme dinya vera qirkerdişê ke vera êzidîyan benê kor û lal a. No pêkerdiş semedê pawitişî şarî nêbi coka ma nê qerarî nas nêkenê. Na herre bi gonîya şehîdan bîye azade. Aye ra  ma destur nêdanê ke na herra bimbareke  bêro leyminkerdene. Ezidixan hetê ciwananê kurdan ra ame xelisnayene. Înan ke pêkerdiş kerdo wextê hêrişê DAÎŞî de ma teslîmê destê dimenî kerd û remayî. Ma rê xayîne kerde. Bi hezaran cinîyê êzidîyan bazaran de ameyî rotene, ma raştê qirkerdişî ameyî, her cayê na herre ra esteyê merdiman vejîyenê. Hukmatê Iraqî heta ewro halê ma nêpesayo. YBJ, YJŞ û hêzanê Asayîşî ma pawit. Hêzê ke roja tenge de cayê ma de bî û semedê ma şehîdî dayî ewro çew nêeşeno înan nêvînayîşî ra bêro. Ma herra xo de yewna hêzî nêwazenê. Ewro ra tepîya qet çew nêeşkeno sey verî Şingalî ser o qeraran bîgero. Gerîlayê HPGyî yê ke semedê pawitişê Şingalî şehîd bîyî ma do çirey înan xo vîrî ra mekerê.

Ma do rêça şehîdanê Şingalî de têkoşînî pîlêr bikero

Jînda Şingal: Seba ke no qerar bê îradeyê şarê ma ameyo girewtene û heta ewro ma înan ra yew xeyr nêdîyo ma qerarê înan nas nêkenê. No qerar yeno manaya qirkerdişê neweyî yê vera êzidîyan. Înanê ke 2014 de ma teslîmê destê DAÎŞî kerd û remayî herinda xorexnekerdişî û ozrê xo waştişî de de ewro derheqê ma de qeraran genê. Çîyo winayên nîno qebulkerdene. Sere de Mam Zekî Şingalî, embaz Zerdeşt, embaz Egîd bi seyan şerwanî semedê Şingalî şehîd bîyî. Şehîdanê ma hem şar perwerde kerd û hem zî hêzê xopawitişî na ro. Ma şehîdanê xo rê deyndarê, ma do senî ke înan ra musayî wina rêça înan de têkoşîn bikerê.

Hînî nêeşkenê şarê Şingalî bixapînê

Xwedêda Elyas: Ma nê plananê leyminan qebul nêkenê. Bi nê pêkerdişî wazenê reyna Şingal de qirkerdişî bidê qewimîyayene. Şarê êzidî hînî wayîrê îdareyê xo vejîyeno û hêzê ci yê xopawitişî esto. Ma destur nêdanê ke partîyî bînî ma bişuxulnê. 6 serrî yo hukmatê Iraqî û keyeyê Barzanî semedê şarê êzidî çîyêk nêkerdo. Wazenê ke bi plananê sîyasîyan şarê Şingalî bixapînê. Ma semedê na herre gonîya xo rişna. Ma do desturê plananê leyminan medê.

Ma xeyrê gerîlayan ewro eşkenê xo bipawê

Dawid Silêman: Ma verî rêxistinkerde nêbî, sîyasetî ra fehm nêkerdêne la badê 2014î zaf çî bedilya. Ma xeyrê embazanê gerîlayan bîyî rêxistinkerde û hêzê xo yê xopawtişî ronayî. Eke derheqê Şingalî de qerarêk yeno girewtene ganî bi îradeyê şarî bêro girewtene. Qeraranê bînan ma nas nêkenê.

PKDyî êzidîyan rê xayînîye kerde

Seydo Eli: Înanê ke wextê hêrişê DAÎŞÎ de ma qederê ma rê caverda û remayî ma pêkerdişê înan nas nêkenê. PDKyî şarê Şingalî rot, ma rê xayînîye kerde. Êzidîyî teberî ra hêzêk nêwazenê.