Şarê Şingalî bi rayraşîyayîşêkî waştişê xo pêşkêşê selahîyetdaranê Iraqî kerd û waşt ke Îdareyo Xoserîya Şingalî û Asayîşê Êzidxanî sey legal bişinasîyê.

Şarê Şingalî merkezê şaristanî de kom bi û ver vi bînaya Heyetê Îdareyî yê Şingalî rayîrî ra şi. Rayraşîyayîşo ke hetê şarê Şingalî ra ame serûberkerdene heta bînaya Asayîşê Niştimanî yê Iraqî dewam kerd.

Çalakîya rayraşîyayîşî de pankartê bi nuşteyê 'Ma îtîfaqê vera Şingalî şermezar kenê' ameye akerdene û sloganê 'Biciwîyo xoverdayîşê Şingalî' ame vatene.

Rayraşîyayîşî ra dima nameyê şarî ser o Hisên Hecî eşkerayîye wende. Eşkerayîye de venga hukmatê Iraqî ame dayene ke Îdareyê Xoserîya Demokratîke yê Şingalî, Asayîşê Êzidxanî sey leqagl bişinasno û eke wina nêbo şarê Şingalî heta peyêne vera na peymane xo ver bido.

Eşkerayîye ra dima waştişê şarî pêşkêşê selahîyetdaranê Asayîşê Niştimanî yê Iraqî ameyî kerdene. Selahîyetdaran da zanayene ke ê do nê waştişan biresnê hukmatî û destê înan ra çita bêro do bikerê.