Qeyûmê qezaya Surî ya Amedî, rixmê serkewtişê weçînayîşê 31’ê Adare yê Partîya Şaran a Demokratîke (HDP), 5 Nîsane de 146 kesî girewtî kar. Şaredarîya Surî kontratê 146 kesanê ke qeyûmî bi hawayêkê bêusulî girewtê kar betal kerdî.

Hemşaredarê Partîya Şaran a Demokratîke (HDP) yê Surî Fîlîz Buluttekîne û Cemal Ozdemîrî, dimeyo ke mazbatayê xo girewtî, seba cigêrayîşê girewtişê xebatkaranê şaredarîye yê wextê qeyûmî komîsyonêk pêard. Netîceyê cigêrayîşanê komîsyanî de girewtişê xebatkaran de bêusulîye ameye tespîtkerdene û nê ameyî raporkerdene. Nê bêusulîyî sey madeyan ameyî rêzkerdene û 146 kesê ke bêsuslîyê ameyê girewtene kontratê ci ameyî betalkerdene.