Şaristananê Wan, Agirî, Colemêrgî û Îdirî yê ke sînorê Rojhelatê Kurdîstanî de yê, ters û qesawetê vîrusê Korona zêde bîyî. Wan û Agirî de nêweşxaneyê demkîyî awan bîyî. Roniştoxê Colemêrgî, Wanî, Agirî û Îdirî seba ke maskeyan bigêrê verê xo da dermanrotoxan. Waştişê zêdêrî ra maske nêmend.

Dima ke hûmara merdimanê ke Îranî de vîrusê Korona ra merdî resaye 30 kesan, berê sînorî yê Wanî, Agirî, Colemêrgî û Îdirî ameyî padayene. Bi desan kesî Rojhelatê Kurdîstanî-Îranî ra derbazê Vakurê Kurdîstanî bîyî, bi şikê vîrusê Korona kewtî binê karantîna. Înan ra xeylêk kesî nêweşxaneyan ra vejîyayî.

Mabênê Berê Gumrukî yê Kapikoyî yê Wanî û Berê Sînorî yê Gurbulakî yê Agirî de vîrusê Korona ra nêweşxaneyê demkî awan bîyî. Nê nêweşxaneyan de kesê ke gumanê vîrusê Korona ci rê yenê kerdene yenê cadayene. Mabên de 30 kesê ke xîret kerdêne berê sînorî yê Bajêrgehî ra Rojhelatê Kurdîstanî ra derbazê Colemêrgî bibê berê sînorî de ameyî vindartene. Destûr nêame dayene ke 30 kesî derbazê Colemêrgî bibê.

Awankerdişê nêweşxaneyanê demkîyan Wan û Agirî de mîyanê şarî de bi semedê panîkî. Naye ra şarî verê xo da dermanrotoxan û dest pê hêrînayîşê maskeyan kerd. Bi nê hawayî vaya maskeyî zî bîye zêdêr. Yenê vatene ke Wan de maske nêmend. Roniştoxê herême vanê ke nêweşxaneyan de bi hawayêkê qîmî doktorî û hacetê weşîye çin ê û îfade kenê ke awankerdişê nêweşxaneyan ê demkîyan zî mojneno ke rewşe çend bitehluke ya. Yeno vatene ke her çiqas berê sînorî girewte yê zî her roje zaf îranijî yenê Wan.