Nuştox û pêşmergeyê Dêrûnî Raber Reşîdo ke prosesê Raperînî de ca girewtbi derheqê rewşa verêne û nikayêne de ANFyî rê qisey kerd.

Raber Reşîdî da zanayene ke wextê Raperîna 1991î de pêşmergeyanê Dêrûnî Kerkûk pawit û kerd ke Cepheyê Kurdîstanî bêro awankerdene.

Reşîdî vat: ''O çax Elî Hesen Mecîd (Kîmyewî Alî) ciwan û camêrdê Pirdê tepiştî. Ma 19-20ê adare de xeylê şehîdî dayî. Kerkûk o çax zî nêxelisîya la tarîxê şorişê kurdan de reya verêne azad bi. Planê azadkerdişê Kerkûkî Pirdê de ame amadekerdene la ma zanayêne ke ameyoxê Kerkûkî do hol nêbo. Çunke her hêz qey xo xebitîyayêne. Rejîmê Baasî yê Saddam Huseyînî hêzê xo şawitî Kerkûkî û pêşmergeyî neçare mendî ke xo apey biancê. Hêzê mîyanneteweyî kewtî herême û seba pawitişê Başûrî înan xeta Paralelê 36.î awan kerde.

Xelisnayîşê Kerkûkî ra 31 serran dima seba ke hêzê kurdî mîyanê xo de şer kenê hêzanê Iraqî reyna Kerkûk îşxal kerd. Destpêkî ra nata hêzêkî waştêne ke Kerkûk bikewo nê halî. Xora nê hêzî seba girewtişê walîtî û meclîsê Kerkûkî xîret nêkerd. Kerkûk nika binê îdareyê kurdan de nîyo û herinda kurdan de erebî est ê. Seba ke hukmatê Kurdîstanî rayê şaristanî seba îqtîdarê xo bar kerdî na rewşe qewimîyaye. Na polîtîkaya xelate qederê Kerkûkî vist nê halî.''